அன்றியும் நின் வரவினை ஆதரித்து - அல்லாமலும் உன்னுடைய
வருகையை விரும்பி; இன்று காறும் நின்று ஏமுறுமால் - இன்று
வரையிலும் எதிர்பார்த்து இருந்து மகிழ்ச்சி அடைவார் ஆதலால்; அவற்
சென்று சேருதி - நீ போய் அகத்தியரை அடைவாயாக; செவ்வியோய்
சேருதல் தேவர்க்கும் நன்று - சிறந்தவனே! அகத்தியரை அடைதல்
விண்ணவர்க்கும் நல்லதே; யாவர்க்கும் நன்று எனா - மற்றெல்லார்க்கும்
நல்லதே ஆகும் என்று கூறி,

     இராமனின் வரவு இராவணாதிகளை அழித்து யாவர்க்கும் நன்மை
புரியும் என மகிழ்வுற்றார்.அரக்கரின் அழிவுக்கு உதவும் கருவிகளை
இராமன் பெற வருவான் என எண்ணிய மகிழ்ச்சியுமாம்.செவ்வியோய் -
அழகுடையோய் என்றுமாம். ஏமுறல் - ஏக்கமடைதல் என்று பொருள் கூறி
இராமன்எப்போது வருவான் என எதிர் பார்த்து ஏங்கினார் என்றும்
உரைப்பர். முன்னுள்ள பாடலில்(2663) கூறிய 'நல்லதே நினைந்தாய்'
என்றதனை மேலும் விரித்துக்கூறியதாம்.                           34

இராமன் அகத்தியனைச் சேர்தல்

    வழியும் கூறி வரம்பு அகல் ஆசிகள் மொழியும் மாதவன் மொய்ம்
மலர்த்தாள் தொழா -அகத்தியர் ஆச்சிரமத்திற்குச் செல்லும் வழியை
விளக்கமாகச் சொல்லி எல்லையற்ற ஆசிமொழிகளைக் கூறும் பெருந்
தவத்தோனாம் சுதீக்கணரின் வண்டுகள் மொய்க்கும் தாமரை மலர்போன்ற
திருவடிகளை வணங்கி; பிழியும் தேனின் பிறங்கு அருவித்திரள் -
அடையிலிருந்துபிழியப்படும் தேன் ஒழுக்குப் போன்று விளங்கிய அருவித்
தொகுதிகள்; பொழியும் சோலைவிரைவினில் போயினார் - நீரைச்
சொரியும் தவச் சாலையிலிருந்து (இராமன் முதலோர்)விரைவாகச் சென்றனர்.