களால்- அந்தக் கைகளால்;உடல் கடைந்தனன் - (சுக்கிரீவனது) உடலைத்
தாக்கிக் கலக்கினான் (வாலி);இவன் உலைந்தனன் -சுக்கிரீவன் பெரிதும்
வருந்தினான். வாலியின் சினத்திற்குக் குரக்கினம் முழுவதும் குடல் கலங்கி அஞ்சி
நடுங்கின. பாற்கடலைக் கடைந்த வாலியின் கைகளுக்குச் சுக்கிரீவன்
உடம்பைக் கலக்குதல் எளிது. ஆதலின் 'கடல் கடைந்த அக்கரதலங்களால்
உடல் கடைந்தனன்' என்றான். உடல் கடைதல் - உடம்பைத் தாக்கி
உறுப்புகள் கலங்குமாறு செய்தல். கொடுமையான வார்த்தைகளைப்
பேசியதோடு வாலி சுக்கிரீவனைத் தாக்கவும் செய்தான் என அவன்
கொடுமையை இராமனுக்கு அனுமன் உணருமாறு கூறினான். உடல் கடைதல்;
இதன்கண் அமைந்த (வினைப்) படிமம்கருதத்தக்கது. 64 | 3850. | 'பற்றி, அஞ்சலன் பழியை - வெஞ் சினம்
முற்றி நின்ற, தன் முரண் வலிக் கையால்,
எற்றுவான் எடுத்து எழுதலும், பிழைத்து,
அற்றம் ஒன்று பெற்ற, இவன், அகன்றனன். |
பற்றி -வாலி சுக்கிரீவனைப் பிடித்துக் கொண்டு;பழியை அஞ்சலன் -
(தம்பியை வருத்துவதால் ஏற்படும்) பழிக்க அஞ்சாதவனாய்;வெஞ்சினம்
முற்றிநின்ற -கொடிய கோபம் மிக்கு நின்ற;தன் முரண் வலிக்கையால் -
தனது மிக்க வலிமையுடைய கையால்;எற்றுவான் -மோதுவதற்கு;எடுத்து
எழுதலும் -உயரத் தூக்கி எழுந்த அளவில்;அற்றம் ஒன்று பெற்று -
அவன் சோர்ந்திருக்கும் சமயம் ஒன்று பெற்று;இவன் பிழைத்து -இந்தச்
சுக்கிரீவன் தப்பிப்பிழைத்து;அகன்றனன் -அவ்விடம் விட்டு அகன்று
ஓடினான். வாலி, தன்னைப் பழிப்பரே என்ற எண்ணம் சிறிதுமின்றித் தன் தம்பியை
மோதிக் கொல்ல, உயரே எடுத்த அளவில் சுக்கிரீவன் வாலி சிறிது
அயர்ந்திருந்த சமயம் நோக்கித் தப்பி ஓடி வந்துவிட்டான் என்பதாம். முரண்
வலி - ஒரு பொருட்பன்மொழி. மிக்க வலிமை. சுக்கிரீவனின் அச்சத்தைப்
பிழைத்தால் போதுமென ஒடி அகன்ற நிலை உணர்த்தும். பழிக்கு அஞ்சாத
வாலியின் கொடுமை உணர்த்தப்பட்டது. 65 வாலிக்கு அஞ்சிய, சுக்கிரீவன் இரலை மலையில் வாழ்தல் | 3851. | 'எந்தை! மற்று அவன்
எயிறு அதுக்குமேல்,
அந்தகற்கும் ஓர்
அரணம் இல்லையால்;
இந்த வெற்பின் வந்து
இவன் இருந்தனன் -
முந்தை உற்றது ஓர்
சாபம் உண்மையால். |
|