தோள்களை உடைய;வென்றி மாருதி - வெற்றிமிக்க அனுமன்;பதுமச்
செங்கண் ஆழியாய் -'செந்தாமரை மலர்போன்ற சிவந்த கண்களையும்
ஆணைச் சக்கரமும் உடையவனே! அடியனேனும் - அடியனாகிய யானும்;
அரிக்குலத்து ஒருவன் - குரங்குக் குலத்தில் தோன்றிய ஒருவனே யாவேன்;
என்றான் -என்று கூறினான். நால்வகை வருணத்தோருள் அந்தணர் உயர்ந்தோராகக் கருதப்பட்டதால்
அந்தணனாகிய அனுமன் அரசனாகிய தன்னை வணங்குதல் தகாது; தருமம்
ஆகாது என்றனன் இராமன். அனுமன் அந்தணன் வேடத்தில் இருந்தமையால்
இராமன் இங்ஙனம் கூறினான். கேள்வி நூல் - வேதம்; சுருதி. செவி வழியாக மட்டும் கேட்கப்படுதலின்
வேதத்தைக் கேள்வி நூல் என்பது பழ மரபு. கேட்டற்கரிய நூற்பொருளைக்
கற்றறிந்தார் வழிக்கேட்டலும் ஆம். 'கற்றிலனாயினும் கேட்க' என்றார்
வள்ளுவரும். (குறள். 414). மறை - வேதம். மருத்துவின் மகனாதலின் 'மாருதி'
என்பது அனுமன் பெயராயிற்று. ஆழியாய் - ஆணைச் சக்கரம் உடையவனே
என்பது பொருள். தயரத சக்கரவர்த்தியின் மகனாதலின் காடாளும் இராமனை
இங்ஙனம் அனுமன் விளித்தான். அடியேன் தானும் - உம்மை இறந்தது
தழீஇய எச்ச உம்மை. சுக்கிரீவனே அன்றி யானும் எனப் பொருள்படும். ஆல்
- அசை. 30 அனுமன் தன் பெரிய வானர உருவத்துடன் நிற்றல் | 3781. | மின்உருக் கொண்ட வில்லோர்
வியப்புற, வேத நல் நூல்
பின் உருக்கொண்டது என்னும் பெருமை
ஆம் பொருளும் தாழ,
பொன் உருக் கொண்ட மேரு,
புயத்திற்கும் உவமை போதாத்
தன் உருக்கொண்டு நின்றான்,
தருமத்தின் தனிமை தீர்ப்பான். |
தருமத்தின் தனிமை தீர்ப்பான்- (துணையின்றி வருந்தும்) தருமத்தின்
தனிமையைப் போக்க வந்தவனாகிய அனுமன்;மின் உருக் கொண்ட -
மின்னலின் வடிவத்தைத் தன்பால் கொண்டாற்போன்ற ஒளிபொருந்திய;
வில்லோர் வியப்புற-வில்லேந்திய இராமலக்குவர் வியப்படையுமாறு;வேத
நல்நூல் - வேதம் முதலான சாத்திரங்களே;பின் உருக் கொண்டது
என்னும் -பின்னர் ஒரு வடிவம் எடுத்து வந்தது என்று;பெருமை ஆம்
பொருளும் தாழ -சிறப்பித்துச் சொல்லும் பாராட்டுரையும் சிறுமையுறும்படி;
பொன் உருக் கொண்ட மேரு - பொன் மயமான வடிவங் கொண்ட
மேருமலையும்;புயத்திற்கு உவமை போதா - தன் தோள்களுக்கு
உவமையில் ஒப்பாகாத;தன் உருவக்கொண்டு நின்றான் - தன்னுடைய
பேருருவத்தைக் கொண்டு நின்றான். 'இவர்களோ தருமம் ஆவார்' (3762) என்ற தொடர்களில் இராமலக்குவர்
குறிக்கப்பட்டனர். அவர்களின் தனிமை தீர்ப்பவன் ஆதலின், அனுமன் தரு |