வெப்பமான பாலை நிலத்தில் செல்வதையாவது தடுக்கும்; (ஆகவே) நன்று
என -(இப் பிலத்துள செல்வதே) நல்லது என்று;மனத்தின் எண்ணினார் -
மனத்திற் கருதியவர்களாய்;போய்ச் சில அறிதும் என்று -(இதனுள்) சென்று
அங்குள்ள சிலவற்றை ஆராய்வோமென்று கூறி;அதனில் புக்கனர் -
அப்பிலத்தினுள் புகுந்து சென்றார்கள். இந்தப் பாலைவனத்தில் இனி ஒரு நொடி செல்வதும் உயிரழிவுக்கே
காரணமாகும்;ஆகவே, இங்கே காணப்படுகின்ற பில வழியில் சென்றால் அது
சீதையிருக்கும் இடமாக இல்லாவிட்டாலுங் கூடப் பாலை நிலத்தின்
வெம்மையையாவது தணிக்கும்: ஆதலால், இப்போது இங்கே செல்வதே நாம்
செய்யத்தக்கது; மேலும், இதனுள்ளிருக்கும் சில இடங்களிலும் சீதையைத்
தேடிப் பார்ப்போ மென்று கருதி வானர வீரர்கள் அப் பிலத்தினுள் புகுந்தனர்
என்பது. திண் பிலம் - எளிதில் கடத்தற்கரிய பிலம். ஒழியவும் - இழிவு சிறப்பும்மை. 'ஒழிய' என்னும், செயவென்னெச்சம் தொழிற்பெயர்த் தன்மைத்தாகித்
'தடுத்தல்' தொழிற்குச் செயப்படு பொருளாய் நின்றது. 26 வானரர் இருளில் வருந்துதல் | 4547. | அக் கணத்து, அப்
பிலத்து அகணி எய்தினார்,
திக்கினொடு உலகு உறச்
செறிந்த தேங்கு இருள்,
எக்கிய கதிரவற்கு
அஞ்சி, ஏமுறப்
புக்கதே அனையது ஓர்
புரை புக்கு எய்தினார். |
அக்கணத்து -(வானர வீரர்கள்) அப்பொழுது;அப்பிலத்து அகணி
எய்தினார் -அந்தப் பிலத்தின் உள்ளிடத்தையடைந்தவர்களாய்;திக்கினொடு
உலகு உற -நான்கு திசைகளிலும் இவ்வுலகத்தும்;செறிந்த தேங்கு இருள் -
மிக நெருங்கி நிறைந்த பேரிருள்;எக்கிய கதிரவற்கு அஞ்சி -(வானத்தில்)
ஏறிய சூரியனிடம் அச்சங் கொண்டு;ஏமுறப்புக்கதே அனையது -பாதுகாப்பு
அடையப் புகுந்தது போலத் தோன்றுவதாகிய;ஓர்புரை -ஒரு குகையில்;
புக்கு எய்தினார் -புகுந்து சென்றார்கள். வானர வீரர் பிலத்துள் புகுகையில் அதனிடையிலே இருள் செறிந்த ஒரு
குகையிலே நுழைந்து செல்லலாயினர் என்பது. அங்கு நிறைந்திருந்த இருளை, தனக்குப் பகைவனான கதிரவனுக்கு
அஞ்சிப் பிலத்துள் பதுங்கியிருப்பதாகக் குறித்தது தன்மைத்
தற்குறிப்பேற்றவணியாம். எக்கிய - ஏறிய (திசைச் சொல்) அகணி -
உள்ளிடம்; புரை: உள்ளறை; (ஏமமுற): ஏமுறு: தொகுத்தல் விகாரம். 27 |