வீரர்கள் - உரிமைத் தொழில்செய்யும் வீரர்கள்; ஐ இரு வெள்ளம் - பத்து
வெள்ளம் ஆகும்.

    ‘கா இல்அரக்கர்’ என்றது இவ்வரக்கர் சீறினால் மற்றவர்க்குக் காப்பு
இல்லை என்றபடியாம். அகம்படி வீரர் - போர் செய்வோர்க்கு வேண்டும்
உதவிகளைச் செய்யும் வீரர் என்பதாம் - இவர்களே பத்து வெள்ளமாயின்
போர் புரிவோர் புதுயுகம் வந்தது போன்ற கணக்கினர் என்றது பொருத்தமே.
                                                          (27)

     கள்ள அரக்கனைச்சுற்றினர் காப்பார் - வஞ்சம் நிரம்பிய
இந்திரசித்துவைச் சுற்றிப் பாதுகாப்பவர்; விற்படை ஓர் நூறுடை வெள்ளம்
என்பார் - வில்லேந்திய படைஓர் ஒரு நூறு வெள்ளம் எனும் கணக்கினர்
ஆவர்; துள்ளிய வாட்படை சொல்லிட ஒண்ணா - துள்ளிப் பாயும் வாள்
ஏந்திய படைஞர் கணக்கிட முடியாதவராம்; பொள்ளல் தரும் கரப்
பூட்கையும் அஃது - துவாரம் உடைய துதிக்கையை உடைய யானைப்
படையும் அதுபோலவே சொல்ல இயலாத அளவினவாகும்.

    முகத்திற்பூட்டியது போன்ற கையை உடைமையால் யானைக்குப் பூட்கை
என்பது பெயர். ‘ஏ’ காரம் அசை.                                 (28)

     ஆய பெரும்படைசெல்வது கண்டு - அத்தகைய இந்திரசித்துவின்
பெரியபடை செல்வதைப் பார்த்து; மாயம் மிகும் திறல் வானர வீரன் -
பகைவர்க்கு மயக்கம் உண்டாக்கத்தக்க மிகுந்த வலி படைத்த குரங்கு வீரன்
ஆய அனுமன்; நாயகரைத் திசை நோக்கி வணங்கி - இராமபிரானை
(அவன் உள்ள) வடதிசை நோக்கி வணங்கி; மேயது ஓர் இன்பம் விளங்கிட
நின்றான் - தன்னிடத்தில் உண்டாகிய மகிழ்ச்சி முகத்தில் விளங்கித் தோன்ற
நின்றான்.