அழுதனர். சோகத்தைத்தணித்துக் கொள்ள, தமது கணவன்மார்களைத்
தொடர்ந்து சென்று தழுவிக்கொள்ள ஓடினர்; அதற்குள் புகை மிகுந்தமையால்
அதில் மறைந்தனர். இக்காட்சி, மின்னல் மேகத்தில் மறைந்ததது
போன்றிருந்தது.                                            (27)

     வரையினை புரைமாடங்கள் எரி புக - மலையை ஒத்த மிகப்
பெரியமாளிகைகளில் நெருப்புப் பற்றிக் கொள்ள; மகளிர் - அங்கிருந்த
அரக்கமாதர்கள்; புரை இல் பொன் கலன் வில்லிட - குற்றமற்ற அழகிய
பொன்மயமான தமது ஆபரணங்கள் ஒளி வீச; விசும்பிடை போவார் -
வானத்தில் எழுந்து சென்றவர்களாய்; கரை இல் நுண் புகை படலையில்
கரந்தனர் - அளவு இல்லாத நுண்ணிய புகையின் திரளிலே மறைந்தார்கள்;
(அதனால், அவர்கள்) கலிங்கம் திரையினுள் பொலி சித்திரம் பாவையின்
செயலார் - கலிங்க நாட்டில் நெய்த துணித் திரையின் உள்ளே விளங்குகின்ற
அழகிய பதுமையின் செயலை அடைந்தவர்களாயினர்.

     நுண்புகைத்தொகுதிக்கு, கலிங்கத்திரையும், அழகிய மகளிர்க்கு சித்திரப்
பதுமையும் உவமைகள். கலிங்கத்திரை - கலிங்க நாட்டுத் துணியால் ஆன
திரைச் சேலை. பாவை - பெண் போன்ற ஓவியம்.                  (28) 

நந்தன வனங்கள்முதலியன வெந்தொழிந்த காட்சி

     பகரும் ஊழியில்- நூல்களில் கூறப்படுவதான யுக முடிவுக் காலத்தில்;
காலம் வெம் கடும் கனல் பருகும் மகர வேலையின் - மிகக் கொடிய
காலாக்கினி உறிஞ்சி வற்றச் செய்யும் மகரம்