:: TVU ::

இராவணன் மந்திரப் படலம்

6113.	'ஆரியன் தன்மை ஈதுஆயின், ஆய்வுறு
	காரியம் ஈதுஎனின், கண்ட ஆற்றினால்,
	சீரியர் மனிதரே; சிறியம் யாம்' எனா,
	சூரியன்பகைஞன் என்று ஒருவன், சொல்லினான்.

சூரியன் பகைஞன் என்று ஒருவன் - சூரிய சத்துரு என்ற பெயர் கொண்ட அரக்கவீரன்; ஆரியன் தன்மை ஈது ஆயின்- மேலோனாகிய நம் மன்னன் தன்மை இதுவென்றால்; ஆய்வுறு காரியம் ஈது எனின் - நாம் எல்லாம் கூடி ஆராய்ச்சி செய்யும் காரியம் இது என்றால்; கண்ட ஆற்றினால் - இது கொண்டு ஆயும் நெறியினால்; சீரியர் மனிதரே - சிறந்தவர்கள் மனிதரே ஆவர்; யாம் சிறியம்- அரக்கராகிய நாம் சிறியவர்களே யாம்; எனச் சொல்லினான் - என்று வருந்திக் கூறலானான்.
ஆரியன்-மேலோன்; இங்கு இராவணனை உணர்த்தும். அற்ப மனிதர்களையும், குரங்கையும் அழிப்பதற்காக ஆராய்வது செயல் எனின், மனிதரே உயர்ந்தவராய் விடுவர்; அரக்கர் சிறியர் என்றாகிவிடுமே என்பது சூரியன் பகைஞனின் வருத்தம்.
(43)
6114.	'ஆள்வினை நிலைமையும், அரக்கர் ஆற்றலும்,
	தாழ் வினை இதனின்மேல் பகரத் தக்கதோ?
	சூழ் வினை மனிதரால் தோன்றிற்றாம்!' எனா,
	வேள்வியின் பகைஞனும் உரைத்து, வெள்கினான்.

வேள்வியின் பகைஞனும் - வேள்வியின் பகைஞன் என்ற பெயருடைய ஒரு அரக்கனும்; சூழ்வினை - இந்த மந்திராலோசனைக் கூட்டம்; மனிதரால் தோன்றிற்றாம் - மானிடர் காரணமாக நிகழ்ந்தது என்றால்; ஆள்வினை நிலைமையும்- அரக்கர்களாகிய நமது ஆட்சியின் மேன்மையும்; அரக்கர் ஆற்றலும் - அரக்கர்களாகிய நம் வலிமையும்; தாழ்வினை இதனின் மேல்- தாழ்ந்த செயல் இதை விடவும்; பகரத்தக்கதோ - வேறு சொல்லத் தகுந்ததுண்டோ; என உரைத்து வெள்கினான்- என்று கூறி வெட்கமுற்றான்;
வேள்வியின் பகைஞன் -'யக்ஞவிரோதி' என்பதன் தமிழாக்கம். இதற்கு மந்திராலோசனை செய்தல் வேண்டாத ஒன்று என்பது வேள்விப் பகைஞன் கருத்தாகும்.
(44)