:: TVU ::

இராவணன் மந்திரப் படலம்

எண் - ஆய்வு. வல்லவோ - வல்லவையோ. ஒன்றிநின்று - ஒருமைப்பாட்டுன் நின்று. மீட்சி-தாழ்வு.
(76)
6147.	' "மீனுடை நெடுங் கடல் இலங்கை வேந்தன்முன்
	தானுடை நெடுந் தவம் தளர்ந்து சாய்வது, ஓர்
	மானுட மடந்தையால்" என்னும் வாய்மொழி-
	தேனுடை அலங்கலாய்!-இன்று தீர்ந்ததோ?

தேனுடை அலங்கலாய் - தேன் சிந்தும் மாலையை அணிந்த மன்னனே! மீனுடை நெடுங்கடல் - மீன் நிறைந்த பெரிய கடலால் சூழப்பட்ட;இலங்கை வேந்தன் - இலங்கைக்கு அரசனான இராவணன்;முன் தான் உடை நெடுந்தவம் - முன் தனக்குண்டான தவபலம்;தளர்ந்து சாய்வது - தளர்ந்து கெடுவது; ஓர் மானுட மடந்தையால் - ஒரு மானிடப் பெண்ணால்;என்னும் வாய் மொழி - என்ற தவறாத சாப மொழி;இன்று தீர்ந்ததோ - இன்று நீங்கி விட்டதோ? இல்லையே!
அலங்கல் - மாலை. வாய்மொழி - உண்மையான மொழி. இங்கே சாபத்தைக் குறித்தது.
(77)
6148.	'ஏறிய நெடுந் தவம் இழைத்த எல்லை நாள்,
	ஆறிய பெருங் குணத்து அறிவன் ஆணையால்,
	கூறிய மனிதர்பால் கொற்றம் கொள்ளலை;
	வேறு இனி அவர்வயின் வென்றி யாவதோ?

ஏறிய நெடுந்தவம் - நீ உயர்ந்த பெரிய தவத்தை; இழைத்த எல்லை நாள் - செய்த காலமாகிய அந்த நாள்; ஆறிய பெருங்குணத்து அறிவன் - அமைதியான சிறந்த குணத்தை உடைய பிரம தேவன்;ஆணையால் - கட்டளையினால்; கூறிய மனிதர்பால் - கூறப்பட்ட மனிதர்களிடம்; கொற்றம் கொள்ளலை - வெற்றிக்கு வரம் கேட்டுப்பெற வில்லை; வேறு இனி அவர் வயின் - இனி அந்த மானிடர்கள் பால்;வென்றி ஆவதோ - வெற்றியடைய முடியுமோ?
ஆறிய - ஆன்றவிந்தடங்கிய. அறிவன் - கடவுளாகிய பிரமன்.
(78)
6149.	'ஏயது பிறிது உணர்ந்து இயம்ப வேண்டுமோ?
	நீ ஒரு தனி உலகு ஏழும் நீந்தினாய்;