:: TVU ::

இரணியன் வதைப் படலம்

- முன்னோனாகிய இரணியனுடைய; காதில் குண்டலங்கள் - காதிலணியும் காதணிகளாம்;இனிப் பெரு விறல் கூறல் - என்றால் அவனுடைய சிறந்த வீரத்தை எடுத்துக் கூறுவதற்கு; மற்று என் - வேறு என்ன வேண்டியுள்ளது?
தருகதிரவன் - ஒளியினால் காக்கும் சூரியன். எண்தலம் - எண்ணுதற்குக் கருவியாகிய மனம். இரண்யம் - பொன். அக்ஷம் - கண், பொற்கணான் - இரண்யாட்சன்.
(12)
6201.	'மயர்வு இல் மன் நெடுஞ் சேவடி மண்ணிடை
	வைப்பின்,
	அயரும், வாள் எயிற்று ஆயிர நனந் தலை அனந்தன்;
	உயருமேல், அண்ட முகடு தன் முடி உற உயரும்;
	பெயருமேல், நெடும் பூதங்கள் ஐந்தொடும் பெயரும்.

மயர்வு இல் மன்- எதனாலும் மனம் சோர்வுறாத மன்னனாகிய இரணியன்; நெடுஞ்சேவடி - தனது நீண்ட பெரிய பாதங்களை; மண்ணிடைவைப்பின் - தரையிலே வைப்பானாயின்; ஆயிரம் நனந்தலை அனந்தன் - ஆயிரம் படங்களைக் கொண்ட (பூமியைத்தாங்கும்) ஆதிசேடன்; அயரும் - (பாதங்களின் கனம் தாங்காது) தளர்வான்; உயருமேல் - (அந்த இரணியன்) எழுந்து நிற்பானாயின்;அண்டமுகடு தன் முடி உற உயரும்- அண்டத்தின் மேல் முகடு தனது தலையில் பொருந்த உயர்வான்; பெயரு மேல் - அவன், இடத்தை விட்டு அசைவானாயின்; நெடும் பூதங்கள் - பெரியனவான பூதங்கள்;ஐந்தொடு பெயரும் - ஐந்தினோடும் பெயர்வான்.
மயர்வு - சோர்வு. நனந்தலை - பணாமுடி (படம்). வாள் - கூர்மை (ஒளியுமாம்).
(13)
6202.	'பெண்ணில், பேர் எழில் ஆணினில், அலியினில்,
	பிறிதும்
	உள் நிற்கும் உயிர் உள்ளதில், இல்லதில், உலவான்;
	கண்ணில் காண்பன, கருதுவ, யாவினும் கழியான்;
	மண்ணில் சாகிலன்; வானிலும் சாகிலன்;-வரத்தால்.

வரத்தால் - இரணியன் தான் பெற்ற வரத்தின் வலிமையால்; பெண்ணில் பேரெழில் ஆணினில் - பெண்களாலோ, பேரழகு படைத்த ஆண்களாலோ; அலியினில் - இவையிரண்டுமல்லாத