கொடியோன் - மிகக் கொடியவனாகிய இரணியன்;கொணர்க
என்மைந்தனை   வல்  விரைந்து என்றனன் - என் மகனை,
மிகவிரைவில்   இங்கு அழைத்து வாருங்கள் என ஏவலர்களுக்கு
உத்தரவிட்டான்;  உணர்வு   இல்    நெஞ்சினன்   ஏவலர்
கடிதினின்  ஓடி-  நல்லுணர்வு   இல்லாத   நெஞ்சினனாகிய
இரணியனின்   ஏவலர்கள்   விரைவாகச்   சென்று;  கணனின்
எய்தினர்- ஒரு கணப் பொழுதில் பிரகலாதனை அடைந்தார்கள்;
பணி என - அரசனது 'கட்டளை' என்று கூற; துணை இலான்
தனை - தனக்குவமையும் ஒப்பும் இல்லாதவனான பரந்தாமனை;
துணை என  உடையவன் -  தனக்கு துணை உடையவனான
பிரகலாதன்; தாதையைக்  கண்டான்  தொழுதான்-  தனது
தந்தையான இரணியனைக் கண்டு வணங்கினான்.
 

உணர்வு - நல்ல   அறிவு. வல்விரைந்து - மிக விரைவாக.
கணனின் -  கணப்     பொழுதில்.   'துணையிலான்' என்றது
தனக்குவமையில்லாத   பரமனை.   'துணையென உடையவன்'
திருமாலையே   உயிர்த்துணை எனக்  கொண்ட பிரகலாதனை.
செயல்களின்   விரைவு   பாடலில்  புலப்படுகின்றது. ஏவலர்
கடமைப்பாங்கும்   பிரகலாதனின்   பணிவும்    தெள்ளிதின்
உணர்த்தப்பட்டன.
 

தொழுத மைந்தனை - (தனது பாதங்களில் வீழ்ந்து) வணங்கிய
மகனை;   சுடர்மணி   மார்பிடை -   ஒளிமிக்க தனது மார்பிலே
பூசப்பட்ட;சுண்ணம் எழுத -வாசனைப் பொடிபிரகலாதன் உடலிலே
படும்படி;அன்பினில் இறுகுறத் தழுவி -   அன்போடு,  இறுகத்
தழுவி;   மாடு  இருத்தி -  தனக்குப்  பக்கத்திலே    இருக்கச்
செய்து;முழுதும் நோக்கி - மகனைப் பாதாதிகேசமாக  முழுவதும்
பார்த்து;  நீ  வேதியன்  கேட்கிலன்  முனிய -  மகனே!  நீ
ஆசிரியன்  கேட்க இயலாதவனாக கோபம் கொள்ளும்படி; பழுது
சொல்லியது என்? - தவறுபடக் கூறியது என்ன?; அது பகருதி
என்றான் - அதைக் கூறுவாயாக என்றான்.