:: TVU ::

108

யுத்த காண்டம்

6234.	' "உன் உயிர்க்கும், என் உயிர்க்கும், இவ்
	உலகத்தினுள்ள
	மன்னுயிர்க்கும், ஈது உறுதி என்று உணர்வுற
	மதித்துச்
	சொன்னது இப் பெயர்" என்றனன், அறிஞரின்
	தூயோன்;
	மின் உயிர்க்கும் வேல் இரணியன் தழல் எழ
	விழித்தான்.

அறிஞரில் தூயோன் - அறிஞர்களில் தூய பேரறிவினனாகிய பிரகலாதன்; உன் உயிர்க்கும் - உன்னுடைய உயிருக்கும்; என் உயிர்க்கும் - என்னுடைய உயிருக்கும்; இவ்வுலகத்திலுள்ள மன்னுயிர்க்கும் - இவ்வுலகத்தில் வாழுகின்ற வேறு பல உயிர்களுக்கும்; ஈது உறுதி என்று - இதுதான் உ.றுதிபயப்பதென்று; உணர்வு உற மதித்துச் சொன்னது- எனதுள்ளத்தே முகிழ்த்த நல்லுணர்வால் ஆராய்ந்து கூறியது; இப்பெயர் - இந்தப் பரமனின் திருப்பெயராகும்; என்றனன்- என்று கூறினான்; (அதைக்கேட்ட) மின் உயிர்க்கும் வேல் இரணியன் - மின்னலைப் போல ஒளிரும் வேலை உடைய இரணியன்; தழல் எழ விழித்தான் - (சினத்தால்) கண்களில் நெருப்பெழ விழித்தான்.
'அறிஞரில் தூயோன்' என்றது பிரகலாதனை. அறிஞரின் அறிஞன் என்றும் தூயர் என்பவர் யாரினும் தூயான் என்றும் முன்னமே (6207) கூறியுள்ளார்.
இரணியன் பிரகலாதனை நோக்கிச் சினந்து கூறுதல்
6235.	' "இற்றை நாள் வரை, யான் உள நாள் முதல், இப்
	பேர்
	சொற்ற நாவையும் கருதிய மனத்தையும் சுடும் என்
	ஒற்றை ஆணை; மற்று, யார் உனக்கு இப் பெயர்
	உரைத்தார்?
	கற்றது ஆரொடு? சொல்லுதி, விரைந்து" எனக்
	கனன்றான்.

இற்றை நாள் வரை - இந்த நாள் வரையும்; யான் உள நாள்முதல் - நான் ஆட்சிக்கு வந்த நாள்முதலாக; இப்பேர் சொற்ற நாவையும் - இந்தப் பெயரைச் சொன்ன நாவையும்; கருதிய