:: TVU ::

112

யுத்த காண்டம்

6240.	' "ஒருவன், யாவர்க்கும் எவற்றிற்கும் உலகிற்கும்
	முதல்வன்,
	தருதல், காத்து, அவை தவிர்த்தல் என்று இவை
	செயத் தக்கோன்,
	கருமத்தால் அன்றிக் காரணத்தால் உள்ள காட்சி,
	திருவிலீ! மற்று இது எம் மறைப் பொருள் எனத்
	தெரிந்தாய்.

திருஇலீ - திருவில்லாதவனே (நல்ல பேறு இல்லாதவனே)!; ஒருவன் - ஒப்பற்ற ஒருவனாகிய நான்; யாவர்க்கும் எவற்றிற்கும் - இவ்வுலகில் வாழும் எல்லோருக்கும் எல்லாவற்றுக்கும்; உலகிற்கும் முதல்வன் - இந்த உலகுக்கும் முதல்வனாயுள்ளேன்; தருதல், காத்தல், அவை தவிர்த்தல் என்று இவை செயத் தக்கோன் - எல்லா உயிர்களையும் படைத்தல், காத்தல், அழித்தல் என்று கூறப்படும் முத் தொழிலையும் செய்யத்தக்கவன் நானே;கருமத்தால் அன்றி - (இதில் நேரில் காணும்) காட்சி அளவையினால் அல்லாது; காரணத்தால் உள்ள காட்சி - கருதுதல் அளவையாகிய அனுமானப்பிரமாண உணர்வால்;மற்று இது - அறிந்து உணரும் இதனை; எம்மறைப் பொருள் எனத் தெரிந்தாய் - எந்த வேதத்தில் கூறப்படும் பொருள் என்று தெரிந்து கொண்டாய்.
தனக்குப் பின் தனது செல்வமனைத்தையும் துய்க்க வேண்டிய மகன் வீணாகப் பகைவன் பெயரைக் கூறி, செல்வத்தை இழக்கப் போகிறானே என்பதை உணர்த்துவான் 'திருவிலீ' எனப் பிரகலாதனை அழைத்தான் என்க. கருமம் - காட்சி காரணம் - அநுமானம் (கருதுதல்)
(52)
6241.	' "ஆதி அந்தங்கள் இதனின் மற்று இல்லை, பேர்
	உலகின்;
	வேதம் எங்கனம், அங்கனம் அவை சொன்ன
	விதியால்,
	கோது இல் நல்வினை செய்தவர் உயர்குவர்;
	குறித்துத்
	தீது செய்தவர் தாழ்குவர்; இது மெய்ம்மை, தெரியின்.

பேருலகின் - மிகப் பெரிய இந்த உலகத்திலே; ஆதி அந்தங்கள் - வேதத்தின் ஆரம்பமுதல் முடிவு வரை கூறுவது; இதனின் மற்று இல்லை - இதைவிட வேறு எதுவுமில்லை; வேதம்