:: TVU ::

206

யுத்த காண்டம்

இராமபிரான் கடற்கரைப் பகுதிகளைக் காணல்
6388.	அப் புறத்து, இராமன், அவ் அலங்கு வேலையைக்
	குப்புறக் கருதுவான், குவளை நோக்கிதன்
	துப்பு உறச் சிவந்த வாய் நினைந்து சோர்குவான்,
	இப் புறத்து இருங் கரை மருங்கின் எய்தினான்.

அப்புறத்து- அடுத்த பகுதியான அந்த இடத்திலே; இராமன்- இராமபிரான்; அவ்அலங்கு வேலையை- அந்த அலை வீசுகின்ற தென் கடலை; குப்புறக் கருதுவான்- தாண்டி, மறுகரை சேர நினைப்பவன்; குவளை நோக்கிதன்- குவளை மலர் போன்ற கண்களை உடைய சீதா பிராட்டியின்; துப்பு உறச் சிவந்த வாய்- பவளம் போன்ற சிவந்த வாயை; நினைந்து சோர்குவான் - எண்ணி, மனம் சோர்ந்தவனாக; இப்புறத்து இருங்கரை- கடலில் இப்புறமான வடபுறத்தின் பெரிய கரையின்; மருங்கின் எய்தினான்- பக்கத்தில் சென்று சேர்ந்தான்.
அலங்குதல் - அலைவீசுதல். குப்புறக்கருதுதல் - தாண்டி அப்பாற் செல்ல நினைத்தல். துப்பு - பவளம்.
(24)
6389.	கானலும் கழிகளும், மணலும், கண்டலும்,
	பானலும் குவளையும், பரந்த புன்னையும்,
	மேல் நிறை அன்னமும் பெடையும், வேட்கை கூர்
	பூ நிறை சோலையும், புரிந்து நோக்கினான்.+

கானலும்- கடற்கரைச் சோலையும்; கழிகளும்- உப்பங்கழிகளும்; மணலும் -கடற்கரை மணலும்; கண்டலும் - தாழைப்புதர்களும்; பானலும் குவளையும்- கருநெய்தலும், குவளை மலரும்; பரந்த புன்னையும் - கடற்கரையில் பரந்துள்ள புன்னை மரங்களும்; மேல்நிறை அன்னமும் - அந்தப் புன்னை மரங்களின் மேல் நிறைந்திருக்கும் அன்னப் பறவைகளும்; பெடையும்- பெண் அன்னங்களும்; வேட்கை கூர் பூநிறை சோலையும் - காண்போர் விரும்பும் மலர் நிறைந்த சோலைகளும்; புரிந்து நோக்கினான் - ஆகியவைகளை எல்லாம் இராமபிரான் விருப்பத்துடன் பார்க்கலானான்.
கானல் - கடற்கரைச் சோலை. கண்டல் - தாழை. பானல் கரு நெய்தல்.
(25)