தேவரைத்   தீமை   செய்த பேதையை- தேவர்களைத்
துன்புறுத்திய   அறிவில்லாத இராவணனை; கொல்வேன் என்று
பேணிய விரதப் பெற்றி- கொல்லுவேன் என்று நானே விரும்பி
ஏற்றுக்கொண்ட   இந்த   விரதத்தின்    தன்மை;   சீதையைக்
குறித்ததேயோ  -    சீதையை     மீட்டு    வருதலைமட்டும்
குறித்ததொன்றோ? அல்ல;  வேதியர்  அபயம் என்றார்க்கு -
அந்தணர்கள் என்னை அடைந்து அடைக்கலம் என்றவர்களுக்கு;
அன்று நான் விரித்துச் சொன்ன   - அவர்கள்  சரணடைந்த
போது நான் விவரித்துக் கூறிய;  காதையைக் குறித்து நின்ற -
செய்தியைப் பற்றி நின்ற; அவ்வுரை கடக்கலாமோ - (அஞ்சல்
என்று கூறிய) அந்தச் சொல்லை நான் மீறலாமோ?
 

"அவதரித்துச் செய்த ஆணைத்தொழில்களெல்லாம் ஆசிரத
விரோதிகளை அழிப்பதற்கே" என்ற வைணவச் சான்றோர் உரை
நினையத்தக்கது.   காதை -  காதா  (பாடல்) இங்கு செய்தியைக்
குறித்தது. 
 

காரியம் ஆக அன்றே ஆகுக  -   நாம் எடுத்த காரியம்
முற்றுப்   பெறட்டும்;    அல்லது     முடியாமல்   போகட்டும்;
கருணையோர்க்குச்     சீரிய     தன்மை   நோக்கின் -
கருணையாளர்க்குரிய சிறந்த  தன்மையை ஆராய்ந்தால்; இதனின்
மேல்   சிறந்ததுண்டோ  -   அடைக்கலம் என்று வந்தவனை
ஆதரித்துக்   காக்கும்   இதைவிட     மேலானதொன்றுண்டோ?
பூரியரேனும்  தம்மைப்   புகல்   புகுந்தோர்க்கு   -  கீழ்
மக்களாயினும்  தங்களைச்   சரணடைந்தவர்களுக்கு;  பொன்றா
ஆருயிர்    கொடுத்துக்   காத்தார் -   அழியாத தங்களது
ஆருயிரைத் தந்தும் காத்தவர்கள்; எண்ணிலா அரசர் அம்மா-
எண்ணிலடங்காத மன்னர்கள் (இவ்வுலகிலுண்டு).
 

காரியம்-மேற்கொண்ட செயங். ஆக - ஆகட்டும்   அன்றே
ஆகுக-ஆகாமல் போகட்டும் சீரியதன்மை-சிறந்தபண்பு.  பூரியர்-
கீழ்மக்கள். 
 

(116)