எழுதலும்- (இராமன் கேட்டவைகளுக்கான   விடை   கூற
வீடணன்) எழுந்தான், அவ்வாறு எழலும்; முழுதுணர் புலவனை
- முற்றும்   உணர்ந்த அறிஞனான வீடணனை;'இருத்தி' என்று
இராமன்   ஏயினான் -   (உட்கார்ந்தே   பேசலாம்   என்ற
எண்ணத்தால்)   இருப்பாயாக   என்று இராமபிரான் கூறினான்;
முளரிக்   கண்ணினான்  -    தாமரை    மலர்   போன்ற
கண்களைஉடைய  இராமபிரான்; பழுதற வினவிய பொருளை
- குற்றம் நீங்கக்   கேட்ட   பொருள்களைப்  பற்றியெல்லாம்;
பண்பினால்     தொழுதுயர்  கையினான் -   பண்போடு,
தொழுதுயர்த்திய   கைகளை     உடையவனாக;    தெரியச்
சொல்லினான்- இராமபிரான்   நன்கு   தெரிந்து   கொள்ள
கூறுவானாயினான்.
 

போர்   மேற்கொண்டு     செல்லுதற்குமுன்   பகைவனது
வலிமையை   ஆராய்ந்து   அறிதல்    வேந்தர்க்குரிய கடமை
என்பதால் 'பழுதற   வினவிய பொருள்' என்றார். சொல்லுதலில்
கேட்பவர்க்குத்   தெளிவு     வேண்டுமென்பதால்   "தெரியச்
சொல்லினான்" என்றார். 
 

(16)
 

இலங்கையின் அரண்
 

அனுமன்தாதை - அனுமானுடைய தந்தையாகிய வாயுதேவன்
(காற்று);   நிலையுடைவடவரை -   நிலைத்ததன்மை   கொண்ட
வடமேருமலையை;     குலைய   நேர்ந்து  -   நிலைகுலைந்து
சிதையும்படி செய்ய நினைத்து;  அதன் தலை என   விளங்கிய
- அந்தவடமலையின்    முடி   என்று     திகழ்ந்த;   தமனியப்
பெருமலையினை- பொன்மயமான  பெரிய   மேரு   மலையை;
மும்முடிவாங்கி - மூன்று சிகரங்களைப் பறித்து   வாங்கி; ஓங்கு
நீர் அலைகடல் இட்டனன்- நிறைந்த   நீரையுடைய கடலிலே
இட்டான்.