வடிவுடையவர்கள்   செழுமையான  நெருப்பை   ஒத்த   திறம்
வாய்ந்தவர் என்றாலும் அவர்களுக்கு அஞ்சமாட்டார்; சிறுமை
கண்டவர்- உருவத்திலே சிறுமையைப் பார்த்தவர்கள்; பெருமை
கண்டு   அல்லது   தேறார் -   பெருமை,   வலிமைகளைக்
கண்டாலல்லது தெளிவு பெறமாட்டார்.
 

'மறுமை  கண்ட   மெய்ஞ்ஞானியர்'   என்போர்   முத்திப்
பேறடைந்த உண்மைமிக்க ஞானிகளாவார். அத்தகைய மேலோர்
இவ்வுலகத்துக்கு  வர   நேர்ந்தாலும்  அவர்களிடம்  ஏதேனும்
சிறப்பியல்புகள்  இருந்தால்   மட்டுமே   உலகத்தார்  மதிப்பர்;
இல்லையென்றால் 'யார்'  என்றே  கண்டு கொள்ள மாட்டார்கள்.
ஒருவரது சிறிய உருவத்தைப் பார்த்தவர்கள் - அச்சிறிய வடிவில்
கொழுந்து  விட்டெரியும்  கனல்  போன்ற ஆற்றலும் ஞானமும்
இருப்பதை   அறிந்து  போற்றார். சிறுமை  கண்டவர்  பெருமை.
வலிமைகளைக் கண்டால் அல்லது தெளிவடைந்து போற்றார்; இது
பிறிது  மொழிதலணியாம். உலகத்தார்  இயல்பைக் கூறி வருணன்
தன்னை மதித்து வராமைக்குக் காரணம் இதுவென  இராமபிரான்
கூறலானான்.
 

திருதி  என்ப  தொன்று  அழிதர- மனவடக்கம்  என்ற
ஒன்று குறைந்திருப்பதால்; ஊழியில் சினவும் பரிதி மண்டிலம்
என- ஊழிக் காலமுடிவில் சினந்து தோன்றும் சூரிய  மண்டிலம்
என்று கூறும்படியாக; பொலிமுகத்தினன்- பொலிந்து தோன்றும்
முகத்தினனான   இராமபிரான்; பலகால்  தருதி   வில் எனும்
அளவையின்- பலமுறை 'வில்லைத்தா' என்று கேட்ட அளவிலே;
தம்பியும்   வெம்பி - தம்பியான   இலக்குவனும் வெகுளியால்
வெம்பி;  குருதி   வெங்கனல்   உமிழ்கின்ற  கண்ணினன்-
குருதியோடு, கொடிய தீப்பொறி உமிழும் கண்களை உடையவனாய்;
கொடுத்தனன்- இராமபிரானிடம் வில்லைக் கொடுத்தான்.