இழை -  அணிகலம்.  மின்னின்  -   மின்னலைப்   போல
(ஒளியுடைய).    மத்தமா    -   மதம்   பொருந்திய   யானை.
மகரமீன்களுக்கும்     தும்பிக்கை      உண்டு.      ஆதலால்
'புழையுடைத்தடக்கை  பொருந்தச்  சுற்றி'  என்றார்.  மேகங்கள்
இடி  முழக்கத்துடன்  மழை  பொழியும்  மகரமும்  மத்தமாவும்
முழக்கம் செய்து போரிட்டன என்பது கருத்து.
 

குன்றுகள்  குரக்கு வீரர்  குவித்தன-  வானர  வீரர்கள்
கொண்டு வந்து குவித்த மலைகள்; ஒன்றின் மேல் ஒன்று வீழ-
ஒன்றின்  மேல்   ஒன்று   வீழ்வதால்;   நெருப்புக்  கோப்ப-
இடையிலே  நெருப்பு  உண்டாக;  சிகரச்   சில்லி -   மலைச்
சிகரங்களின்   சிறுதுண்டுகள்;   உகைத்து  எழுந்து   உம்பர்
நாட்டுச்  சென்று- வேகத்தோடு   எழுந்து   விண்ணுலகுக்குச்
சென்று;   மேல்   நிலை   பெறாது- மேலே  நிலைத்து நிற்க
இயலாமல்; பொன்றின சிறிய புண்ணியம்  புரிந்தோர் போல-
இறந்து  போய்விட்ட  சிறிதளவு  புண்ணியம்  செய்தவர்கள் தாம்
செய்த     புண்ணியத்திற்கேற்ப     விண்ணுலகம்      சேர்ந்து
புண்ணியப்பயன்  தீர்ந்து  மீண்டும்  மண்ணுலகு  வருவது போல;
திரிந்தன- கீழே வந்து வீழ்ந்தன.
 

கோப்ப -  உண்டாக  (பிறக்க).  சிகரச்  சில்லி  -  மலைச்
சிகரத்தின் சிறிய துண்டுகள். உகைத்து - விரைந்து உவமையணி.
உம்பர் நாடு - தேவருலகம்.
 

(22)