துகைத்தவன்     உடற்பொறை  - (தன்னை நிலத்தில்)
தேய்த்தவனான இராவணனின் உடலை; சுறுக்கொள இறுக்கி -
புகை   நாற்றம்    எழுமாறு  இறுக்கிப் பிடித்து; தகைப் பெரு
வலத்தொடு  - தகுதி   நிறைந்த   வலிமையோடு; தலத்திடை
அமுக்கி- பூமியில்   அழுத்தி;   வகைப்  பிறை  நிறத்து -
பல்வகையான  வடிவங்களைக்  கொண்ட பிறைகளைப் போன்ற
தன்மையுடைய;    எயிறுடைப்     பொறி   வழக்கின்   -
(இராவணனுடைய) பற்களைக்  கொண்ட   உறுப்பாகிய  வாயின்
வழியே;   குகைப்  பொழி   புதுக்குருதி  -  குகையிலிருந்து
பொங்குகின்ற     வெள்ளம்    போலப்  (பொங்குகின்ற)  புதிய
இரத்தத்தை;   கைக்கொடு   குடித்தான்  -  (சுக்கிரீவன் தன்)
கைகளால் அள்ளிக் குடித்தான்.
 

சுறுக்கொளல்- புகை  நாற்றம்  வீசுதல்.  "மங்கையர்  நறுங்
கூந்தலின் சுறு நாறுகின்றது" (கம்ப. 6083) பிறை நிலாப் பல்வேறு
வடிவங்களில்    தோன்றுவது   போல், இராவணனின் பற்களும்
பல்வேறு   வடிவங்களில்     தோன்றுவதால்     "வகைப்பிறை
நிறத்து  எயிறு" என்றார். வழக்கின் - வழியின், பொருட்சிறப்பால்
"வழக்கி" எனும் பாடம் தவிர்த்து.  "வழக்கின்"   எனும்   பாடம்
கொள்ளப்பட்டது; இராவணன் பெரிய  வாய்,  குகைக்கும் அதில்
கொட்டும்  இரத்தம் குகையிலிருந்து  கொட்டும் வெள்ளத்திற்கும்
உவமை.
 

மைகொடு   நிறத்தவன் - மை போற் கறுத்த நிறமுடைய
இராவணன்;    கைகொடு  குடித்தவன்- கைகளினாலே (தன்
உதிரத்தைக்)  குடித்தவனான    சுக்கிரீவனுடைய; உடல் கனக
வெற்பை- உடல் என்னும் மேருகிரியை;   பைகொடு விடத்து
அரவு  எனப்-  பையில்  கொடிய   நஞ்சினையுடைய பாம்பு
பற்றியதுபோல;  பலகை  பற்றி - தன் பற்பலவான கரங்களால்
பிடித்து;  மறத்தொடு  -  வீரத்துடன்;  புறத்தில்  திக்கொடு
பொருப்பு உற- புறத்தே   உள்ள   எட்டுத்  திசையிலுமுள்ள
மலைகளின் மீது   மோதுமாறு;  நெருப்பொடு   திரித்தான் -
தீப்பொறி சிதறச் சுழற்றினான்.
 

விசை    மிகுதியுடன்   ஒரு   பொருள் ஒரு பொருளோடு
மோதுகையில் தீ எழும் எனும் அறிவியல் உண்மை. "பொருப்புற
நெருப்பொடு திரித்தான்" என்பதனால் உணர்த்தப்பட்டது.
 

(13)