கும்பானு  என்னும் அரக்க  சேனைத்தலைவன் அங்கு வந்து;
நெடும்சரம் துரக்க- மிகத் தூரம் செல்லும் அம்புகளை ஏவ;
வானரச் சேனை துணிந்த- குரங்குப் படை துண்டுபட்டன.
 

இது  முதல்  ஆறு  பாடல்கள்  கும்பானுவும் இடும்பனும்
போரிட்டு மாண்டது கூறும். நீலன் இட்ட மராமரத்துக்கு அஞ்சி,
அரக்கர் சேனை ஓடுவதைத் தடுத்து,கும்பானு வானரச்சேனைகள்
துண்டுபடுமாறு கணைகள் சொரிந்தான் என்பதாம்.
 

கண்டு   நின்ற   கரடியின்   காவலன் -    (இவ்வாறு
வானரப்படை   துண்டுபடுவதை)  நோக்கி  நின்ற  கரடிகட்குத்
தலைவனாகிய;   எண்திசாமுகம்  எண்ணும் -  எட்டுத்திக்கில்
இருப்போரும்   மதிக்கின்ற;   இடும்பன் -    (வலியோனாகிய) 
இடும்பன்; தடவரை கொண்டு - ஒரு பெரிய மலையைக் கையில்
கொண்டு; ஓர் சண்ட  மாருதம் என்ன- பெரும் புயல் காற்றுப்
போல; அவன் எதிர் குப்புறா- அக்கும்பானு என்னும் அரக்கர்
படைத்தலைவன் முன் சென்று கவிழ்ந்து குதித்து; சீறி-கோபித்து;
(எறிதலும் என்று அடுத்த பாடலொடு தொடரும்).
 

குளகம்.  குப்புறல்-குதித்தல்.  கரடியின் காவலன் இடும்பன்.
எண்திசா   முகம்     எண்ணும்   இடும்பன்   எனக்கூட்டுக.
திசாமுகம் - ஆகுபெயராய்த்  திசாமுகத்தில்     உள்ளோரைக்
குறித்தது. இடும்பன்-சாம்பவானின் வாயிற்பிரதானி என்பர்.
 

(63)
 

தொடுத்த   வாளிகள் - (கும்பானு  என்னும்  அரக்கர்
படைத்தலைவன்)  விடுத்த  அம்புகள்;  சூழ்ந்து-  சுற்றிலும்;
விழும்முன்-வீழ்வதற்கு முன்னால்; எதிர் எடுத்த குன்றை-
நேராக உயர்த்திப் பிடித்த மலையை; இடும்பன் எறிதலும்-
(கரடிகள்  தலைவனாகிய)   இடும்பன்   வீசி   எறிந்தவுடன்;
(அதனால்) ஒடித்த