வானத்தை இடிக்க நினைப்பான்; எண்ணிய உயிர்கள் எல்லாம் -
(உலகில்) எண்ணிக் கணக்கிடப்பட்டுள்ள உயிர்கள் அனைத்தையும்;
ஒரு கணத்து எற்ற எண்ணும் - ஒருகண நேரத்தில் அழிக்க
எண்ணுவான்; பெண் எனும் பெயர எல்லாம் பிளப்பென் - பெண்
என்ற பெயரைக் கொண்ட பொருள்களை எல்லாம் பிளந்து
அழிப்பேன்; என்று எண்ணும் - என்று நினைப்பான்; எண்ணி -
அவ்வாறு நினைத்து; புண்ணிடை எரிபுக்கென்ன - புண்ணில் தீப்
புகுந்தது போல; மானத்தால் புழுங்கி நையும் - மான உணர்வினால்
(மனம்) புழுங்கி வருந்துவான்.
|
தனக்குத் துன்பம் வருகிற போது பெண்ணாசையை மறத்தலும்
வெறுத்தலும் செய்யும் இராவணன் பிறகு அதை மறந்தவனாகிக் காமப்
பித்துக் கொண்டு செயல்படுவதை எண்ணுக.
|
(264)
|
தானியமாலி இராவணன் அடி வீழ்ந்து அரற்றல்
|
| 7991. | ஒருவரும் உரையார் வாயால், உயிர்த்திலர், உள்ளம் ஓய்வார்,
வெருவரும் தகையர் ஆகி, விம்மினர் இருந்த வேலை,
தரு வனம் அனைய தோளான்தன் எதிர் தானிமாலி
இரியலிட்டு அலறி, ஓயாப் பூசலிட்டு, ஏங்கி வந்தாள்;
|
ஒருவரும் வாயால் உரையார் - (இராவணனைச்
சூழ்ந்திருந்தவர்கள்) ஒருவரும் வாயால் எதுவும் பேசாமல்;
உயிர்த்திலர் - மூச்சுக்கூட விடாதவர்களாய்; உள்ளம் ஓய்வார் -
மனம் (தடுமாறி) ஓய்ந்து; வெரு வரும் தகையர் ஆகி - அஞ்சுகிற
தன்மை உடையவர்களாகி; விம்மினர் இருந்த வேலை -
அழுதவர்களாய் இருந்த பொழுது; தருவனம் அனைய தோளான் -
மரங்கள் அடர்ந்த வனம் போன்ற தோள்களை உடைய இராவணன்;
தன் எதிர் - தன் எதிரில்; தானிமாலி - தானிய மாலி (என்ற அவன்
மனைவி); இரியலிட்டு - நிலைகெட்டு; அலறி - அலறிக் கொண்டு;
ஓயாப் பூசலிட்டு - ஓயாத பேரொலி செய்து கொண்டு; ஏங்கி வந்தாள்
- அழுது கொண்டு வந்தாள்.
|
வெருவரல் - அஞ்சுதல், இரியல் - நிலைகெட்டு ஓடல், பூசல் -
பேரொலி. உரையார், உயிர்த்திலர்.
|
(265) |