| 8469. | ஆயிரம் தேரை, ஆடல் ஆனையை, அலங்கல் மாவை,
ஆயிரம் தலையை, ஆழிப் படைகளை, அறுத்தும்,
அப்பால்
போயின பகழி வேகத் தன்மையைப் புரிந்து நோக்கும்;
பாயும் வெம் பகழிக்கு ஒன்றும் கணக்கு இலாப்
பரப்பைப் பார்க்கும்;
|
ஆயிரம் தேரை, ஆடல் ஆனையை - ஆயிரக்கணக்கான
தேர்களையும், வெற்றியை உடைய யானைகளையும்; அலங்கல் மாவை
- மாலையணிந்த குதிரைகளையும்; ஆயிரம் தலையை ஆழிப்
படைகளை - ஆயிரக்கணக்கான (வீரர்) தலைகளையும், சக்கரப்
படைகளையும்; அறுத்தும் அப்பால் போயின - அறுத்தும் அப்பாற்
சென்ற; பகழி வேகத் தன்மையைப் புரிந்து நோக்கும் - அம்புகளின்
விரைவுத் தன்மையினைப் புரிந்து நோக்குவான்; பாயும் வெம்பகழிக்கு
- பாய்ந்து (ஊடுருவிச்) செல்வனவாகிய அம்புகளுக்கு; ஒன்றும்
கணக்கிலாப் பரப்பைப் பார்க்கும் - சிறிதும் கணக்கிட்டுக்
கூறுவதற்கில்லாத போர்க்களத்தின் பரப்பினை உற்றுப் பார்ப்பான். |