:: TVU ::

யுத்த காண்டம்

7711.	‘வல் நெஞ்சின் என்னை நீ நீத்துப் போய், வான் அடைந்தால், இன்னம் சிலரோடு ஒரு வயிற்றின் யார் பிறப்பார்? மின் அஞ்சும் வேலோய்! விழி அஞ்ச வாழ்கின்றார், தம் நெஞ்சம் தாமே தடவாரோ, தானவர்கள்?
மின் அஞ்சும் வேலோய் - மின்னலும் அஞ்சும்படி ஒளி வீசுகின்ற வேல் படையை உடையவனே; என்னை நீ வன் நெஞ்சின் நீத்துப் போய் - என்னை நீ வலிய நெஞ்சுடையவனாக விட்டுப் போய்,; வான் அடைந்தால் - வீரர் உலகு அடைந்தால்; இன்னம் - இனிமேல்; சிலரோடு ஒரு வயிற்றின் பிறப்பார் யார் - சிலருடன் ஒரு (தாய்) வயிற்றில் பிறக்க (விரும்புபவர்) யார்? விழி அஞ்ச வாழ்கின்றார் - கண் (எதிரில் வர) அஞ்சி வாழ்கின்றவர்களாகிய; தானவர்கள் - தனுவின் வழி வந்த அசுரர்கள்; தம் நெஞ்சம் தாமே தடவாரோ - தம் மார்பைத் தாமே தடவிக் கொண்டு வரமாட்டார்களா?
வன்நெஞ்சில் - என்னைப் பிரியாமல் இருந்த நீ இப்போது கல் நெஞ்சனாய் என்னைப் பிரிந்தாய். வான் - வீர சுவர்க்கம், நெஞ்சம் தடவல் - தன் பகை போய்விட்டது எனச் செருக்கி நெஞ்சைத் தடவுதல்.
(80)
7712.	‘கல் அன்றோ, நீராடும் காலத்து, உன் கால் தேய்க்கும்- மல் ஒன்று தோளாய்!-வட மேரு? மானுடவன் வில் ஒன்று நின்னை விளிவித்துளது என்னும் சொல் அன்றோ என்னைச் சுடுகின்றது, தோன்றால்!
மல் ஒன்று தோளாய் - (மற்போர்) வலி பொருந்திய தோள்களை உடையவனே; வடமேரு - வடக்கில் உள்ள மேருமலை; நீராடும் காலத்து - (நீ) நீராடும் பொழுது; உன் கால் தேய்க்கும் - உன் பாதத்தை (அழுக்குப் போகும்படி) தேய்ப்பதற்கு; கல் அன்றோ - (பயன்படும்) கல் அல்லவா? தோன்றால் - ஆடவர்களில் சிறந்தவனே; மானுடவன் வில் ஒன்று - (அத்தகு வலியுடை) உன்னை மனிதனின் வில்லில் (இருந்து வந்த) அம்புகளில் ஒன்று,; விளித்துளது என்னும் - இறக்குமாறு செய்தது என்கின்ற; சொல் அன்றோ என்னைச் சுடுகின்றது - சொல் அல்லவா என்னை மிகவும் வருத்தப்படச் செய்கின்றது.
(81)