வில் தொத்திய வெங் கணை, எண்கின் வியன்
பல் தொத்தியபோல் படியப் பலவும்,
முற்றச் சுடர் மின்மினி மொய்த்துள வன்
புற்று ஒத்த-முடித் தலை பூழியன.
 

வில்   தொத்திய   வெங்கணை   பலவும்   -   (இலக்குவனது)
வில்லினின்று (வெளிப்பட்டுத்)  தொடர்ந்த  அம்புகள் பலவும்; எண்கின்
வியன்பல் தொத்திய  போல்   படிய  -  கரடியின்  பெரிய  பற்கள்
கௌவிப் பற்றினாற் போன்று  தைத்து  ஊன்ற; பூழியன முடித்தலை -
புழுதியிற்  கிடப்பனவாகிய   முடியணிந்   தலைகள்;   சுடர்மின்மினி
முற்ற  மொய்த்துள  புற்று  ஒத்த - ஒளியினை  உடைய  மின்மினிப்
பூச்சிகள்  முழுவதும் மொய்த்துள்ள வலிய புற்றுக்களை ஒத்தன.
 

                                                 (34)
 

படு மாரி நெடுங் கணை பாய்தலினால்,
விடும் ஆறு உதிரப் புனல் வீழ்வனவால்,
தடுமாறு நெடுங் கொடி, தாழ் கடல்வாய்
நெடு மா முகில் வீழ்வ நிகர்த்தனவால்.
 

படுமாரி  நெடுங்கணை  பாய்தலினால் - பெய்கின்ற மழையினைப்
போன்று  நீண்ட  அம்புகள்   (உடம்பிற்) பாய்தலினால்; விடும் உதிரப்
புனல்  ஆறும்  வீழ்வனவால்  -  வெளிப்பட்டுப் பெருகிய குருதி நீர்
ஆற்றினையொத்து   (ச்சென்று    கடலில்)   வீழ்வனவாயின;  தடுமாறு
நெடுங்கொடி  -  தாழ்  கடல்வாய்  -  (அரக்கர்  சேனையினின்றும்)
தளர்ந்து வீழும் நீண்ட கொடிகள் ஆழமான கடலிலே; நெடுமா முகில்
வீழ்வ   நிகர்த்தனவால்   -   நீண்ட  பெரிய  மேகங்கள்  (படிந்து)
வீழ்வனவற்றை ஒத்தன.
 

                                                 (35)
 

மின் ஆர் கணை தாள் அற வீச, விழுந்து,
அன்னார் உதிரத்துள் அழுந்துதலால்,
ஒன்னார் முழு வெண் குடை ஒத்தனவால்,
செந் நாகம் விழுங்கிய திங்களினை.
 

ஒன்னார் முழுவெண்குடை - பகைவராகிய அரக்கருடைய முழுமை
வாய்ந்த வெண்குடைகள்; மின் ஆர் கணை வீச தாள் அற விழுந்து
- (இலக்குவன் ஏவிய) ஒளி மிக்க அம்புகள் துணித்தலால்