:: TVU ::

அதிகாயன் வதைப் படலம்

இரண்டாம் வேற்றுமை உருபும் பயனும் உடன் தொக்க தொகை. நுந்துவென் - தன்மை ஒருமை வினை முற்று. ஆல் - அசை.
(41)
7768.	‘செம் பொன்னின் அமைந்து சமைந்தன தேர் உம்பர் நெடு வானினும் ஒப்பு உறழாப் பம்பும் மணி தார் அணி பாய் பரிமா, இம்பர் நடவாதன, ஈகுவெனால்.
செம்பொன்னின் அமைந்து சமைந்தன தேர் - செம்பொன்னால் செய்யப்பட்டு உறுதி பொருந்திய தேர்களும்; உம்பர் நெடுவானினும் ஒப்பு உறழாப் - மேல் உள்ள வானுலகத்திலும் ஒப்பும் மாறுபாடும் இல்லாத; பம்பும் மணிதார் அணி - நிறைந்த மணிகளால் ஆன மாலைகளை அணிந்து; இம்பர் நடவாதன - இவ்வுலகத்தில் நடக்காதனவாகி; பாய்பரிமா - பாய்ந்து செல்லும் குதிரைகளை; ஈகுவெனால் - தருவேன்.
பம்புதல் - நிறைதல், இம்பர் - இவ்வுலகில் சமைந்தன - முற்றெச்சம். பரிமா - இரு பெயரொட்டுப் பண்புத்தொகை. ஆல் - அசை.
(42)
7769.	‘நிதியின் நிரை குப்பை நிறைத்தனவும், பொதியின் மிளிர் காசு பொறுத்தனவும், மதியின் ஒளிர் தூசு வகுத்தனவும், அதிகம் சகடு ஆயிரம் ஈகுவெனால்.
நிதியின் நிரை குப்பை நிறைத்தனவும் - நிதிகளின் வரிசை மிகுதியாக நிறைந்து வைத்தனவும்; பொதியின் மிளிர் காசு பொறுத்தனவும் - மூட்டையாக ஒளிவிடுகிற மணிகள் தாங்கியனவும்; மதியின் ஒளிர் தூசு வகுத்தனவும் - நிலவு போல் ஒளிவிடுகிற பட்டாடைகள் வகை வகையாக வைக்கப்பட்டனவும்; சகடு ஆயிரம் அதிகம் ஈகுவெனால் - ஆகிய வண்டிகள் ஆயிரத்திற்கும் அதிகமாகத் தருவேன்.
குப்பை - மிகுதி, தூசு - ஆடை, வகுத்தல் - வகை வகையாக வைத்தல், சகடு - வண்டி.
(43)
7770.	‘மற்றும், ஒரு தீது இல் மணிப் பணி தந்து, உற்று உன் நினைவு யாவையும் உந்துவெனால்;