:: TVU ::

வேல் ஏற்ற படலம்

199

குரக்குச் சேனை களத்திற்கு மீண்டு வருதல்
9531.	'பெரும் படைத் தலைவர் யாரும் பெயர்ந்திலர்;
	பெயர்ந்து போய், நாம்
	விரும்பினம் வாழ்க்கை என்றால், யார் இடை
	விலக்கற்பாலார்;
	வரும் பழி துடைத்தும்; வானின் வைகுதும், யாமும்'
	என்னா,
	இருங் கடல் பெயர்ந்தது என்ன, தானையும் மீண்டது
	இப்பால்.

பெரும்படைத் தலைவர் யாரும் - பெருமையுடைய படையின் தலைவர்கள் எல்லாரும்; பெயர்ந்திலர் - நீங்கினர் அல்லர்; பெயர்ந்து போய் - படை வீரர் போர்க்களத்தை விட்டு நீங்கி; நாம் விரும்பினம் வாழ்க்கை என்றால்- நாம் மட்டும் உயிர் வாழ விரும்பினாம் என்றால்; இடை விலக்கற்பாலார் யார் - இடையில் நின்று நம்மைத் தடுப்பதற்குரியவர் யார்?; வரும் பழி துடைத்தும்- (அதனால்) வருகின்ற பழியைத் துடைப்போம்; யாமும் வானில் வைகுதும் என்னா- நாங்களும் துறக்கவுலகில் வாழ்வோம் என்று உறுதி கொண்டு; இருங்கடல் பெயர்ந்தது என்ன- பெரிய கடல் நிலை பெயர்ந்து வந்தது போன்று; இப்பால் தானையும் மீண்டது - இப்பக்கம் வானரப்படையும் மீண்டு வந்தது.
(1)
இராவணன் போர்க்களம் செல்லுதல்
கலித்துறை
9532.	சில்லி ஆயிரம், சில் உளைப் பரியொடும் சேர்ந்த,
	எல்லவன் கதிர் மண்டிலம் மாறு கொண்டு
	இமைக்கும்,
	செல்லும் தேர்மிசைச் சென்றனன் - தேவரைத்
	தொலைத்த
	வில்லும், வெங் கணைப் புட்டிலும், கொற்றமும்,
	விளங்க.

சில்லி ஆயிரம்- ஆயிரம் சக்கரங்களோடும்; சில் உளைப் பரியொடும் சேர்ந்த- சிலவாகிய பிடரி மயிருடைய ஆயிரம்