:: TVU ::

228

யுத்த காண்டம்

போர்க்களக் காட்சியை வீடணன் காட்டிக் கூறுதல்
9585.	ஆயிரம் பருவம் கண்டால், காட்சிக்கு ஓர் கரையிற்று
	அன்றால்;
	மேயின துறைகள்தோறும் விம்மினார் நிற்பது
	அல்லால்,
	பாய் திரைப் பரவை ஏழும் காண்குறும் பதகர் என்ன,
	'நீ இருந்து உரைத்தி' என்றார்; வீடணன் நெறியின்
	சொல்வான்;

பாய் திரைப்பரவை ஏழும்- அலைகள் பாய்ந்து வரும் கடல்கள் ஏழையும்; காண்குறும் பதகர் என்ன- காண விரும்பும் பாவிகளைப் போல; மேயின துறைகள் தோறும்- விரும்பிய துறைகள் தோறும்; விம்மினார் - மகிழ்ந்து; நிற்பது அல்லால் - நிற்பதன்றி; ஆயிரம் பருவம் கண்டால் காட்சிக்கு ஓர் கரையிற்று அன்றால் - ஆயிரம் ஆண்டுகள் ஆனாலும் சாட்சிக்கு ஒரு கரை காணல் இயலாது; நீ இருந்தி உரைத்தி என்றார் - அமைதியாக இருந்து நீ சொல்க என்றனர்; வீடணன் நெறியின் சொல்வான் - வீடணன் முறையாகக் கூறுவான்.
(5)
சந்தக் கலித்துறை
9586.	'காகப் பந்தர்ச் செங் களம் எங்கும், செறி கால
	ஓகத்து அம்பின் பொன்றினவேனும், உடல் ஒன்றி,
	மேகச் சங்கம் தொக்கன, வீழும் வெளி இன்றி,
	நாகக் குன்றின் நின்றன காண்மின் - நமரங்காள்!

நமரங்காள்- நம்மவர்களே!; ஓகத்து அம்பின் பொன்றினவேனும்- (இராமனின்) அம்புக் கூட்டத்தால் இறந்தன ஆயினும்; உடல் ஒன்றி - உடல்கள் ஒன்றுடன் ஒன்று ஒட்டி; செறி கால - இரத்தச் சேற்றில் சிக்கிய கால்களுடன்; மேகச் சங்கம் தொக்கன - மேகக் கூட்டம் கூடியது போல்; வீழும் வெளி இன்றி - தரையில் வீழ இடமின்றி; காகப் பந்தர் செங்களம் எங்கும்- காகங்களிட்ட பந்தரை உடைய சிவந்த போர்க்களம் எங்கும்; நாகக் குன்றின் நின்றன காண்மின்- யானை மலைகள் நின்றுள்ள நிலையைப் பாரீர்.
ஓகம் - பெருங்கூட்டம்; சங்கம் - கூட்டம்; நாகம் - யானை
(6)