:: TVU ::

வானரர் களம் காண் படலம்

241

வடாது திக்கின் - வடதிசைக்குரிய; மதவரையின் வழி - மதம் பொழியும் குன்றம் போன்ற சாருவ பௌமம் என்ற யானை மரபில் தோன்றி; கடாம் முகத்த - மதநீர் பொழியும் முகமுள்ள இந்த யானைகள்; கொடாது நிற்றலின் - (பிரமன் இப்பூமியைத் தாங்குக என) அருளாது இருத்தலால்; கொற்ற நெடுந்திசை - வெற்றியுடைய நீண்ட திக்கினை; எடாது நிற்பன - தாங்காமல் நிற்பன;நாட்டம் இமைப்பு இல- தேவர்போல் கண் இமையாதன; முளரிக் கணக்க- பதுமம் எனும் பெருந்தொகையன.
(31)
9612.	'வானவர்க்கு இறைவன் திறை தந்தன
	ஆன வர்க்கம் ஒர் ஆயிர கோடியும்,
	தானவர்க்கு இறைவன் திறை தந்தன
	ஏனை வர்க்கம் கணக்கு இல, இவ் எலாம்.

வானவர்க்கு இறைவன் திறைதந்தன - இந்திரனால் (இராவணனுக்கு) கப்பப்பொருள்களாகத் தந்தன; ஆன வர்க்கம் ஓர் ஆயிரகோடி - ஆகிய கூட்டம் ஓர் ஆயிரகோடியாகும்; தானவர்க்கு இறைவன் - தானவர்க்குத் தலைவன்; திறை தந்தன - கப்பமாக அளித்தவை; ஏனை வர்க்கம் - மற்றோர் இனமாம்; இவ்எலாம் கணக்கு இல- இவற்றிற்குக் கணக்கு இல்லை.
(32)
9613.	'பாற்கடல் பண்டு அமிழ்தம் பயந்த நாள்,
	ஆர்த்து எழுந்தன, ஆயிரம் ஆயிரம்
	மால் கணப் பரி இங்கு இவை; மாறு இவை;
	மேற்கின் வேலை வருணனை வென்றவால்.

இங்கு இவை- இங்கே காணப்படும் இக்குதிரைகள்; பண்டு பாற்கடல் அமிழ்தம் பயந்த நாள்- முன்னர்ப் பாற்கடல் அமுதத்தை அளித்த நாள்; ஆர்த்து எழுந்தன - ஆரவாரம் செய்து எழுந்தன; ஆயிரம் ஆயிரம் - ஆயிரம் ஆயிரம் கணக்குடையன; மால்கணம் பரி - பெருமைமிக்க போர்க்களக் குதிரைகள்; மாறு இவை - இவற்றிற்கு மாறாகத் தோன்றும் இவை; மேற்கின் வேலை வருணனை வென்றன - மேற்கேயுள்ள கடலில் தெய்வமாக உள்ள வருணனைவென்றவை.
(33)
9614.	'இரு நிதிக் கிழவன் இழந்து ஏகின
	அரிய அப் பரி ஆயிரம் ஆயிரம்;