:: TVU ::

310

யுத்த காண்டம்

9743.	அரக்கன் அன்று எடுத்து ஆர்க்கின்ற ஆர்ப்பும்,
	போர்ப்
	பொருப்பு மெய் வில் தெழிப்பும் உண்டேகொலாம் -
	குரைக்கும் வேலையும் மேகக் குழாங்களும்
	இரைத்து இடிக்கின்ற, இன்றும் ஓர் ஈறு இல!

அன்று- (இராம இராவணப்போர் நடந்த) அன்று; அரக்கன் - இராவணன்; எடுத்து ஆர்க்கின்ற ஆர்ப்பும்- குரலெடுத்து முழங்கிய முழக்கமும்; பொருப்பு மெய்- மலை போன்ற வடிவுடைய; போர் வில் தெழிப்பும்- போர் வில்லினின்று எழுப்பிய பேரொலியும்; உண்டே கொலாம்- (இன்றும்) இருக்கின்றன போலும்! குரைக்கும் வேலையும்- ஒலிக்கின்ற கடலும்; மேகக் குழாங்களும்- முகில் கூட்டங்களும்; இன்றும் - இக்காலத்தும்; இரைத்து- பேரொலி செய்து;இடிக்கின்ற- இடிமுழக்கம் செய்கின்றன;ஓர் ஈறு இல - அப்பேரொலிகட்கு ஒரு முடிவே இல்லை.
இன்றும் கடல் முழங்குவதும் இடி இடிப்பதும் இராவணன் முழக்கத்தின் தொடர்ச்சியோ என்னும்படி அமைந்துள்ளது. தற்குறிப்பேற்ற அணி.
(40)
9744.	மண்ணில் செல்வன செல், இனும் மாசு அற
	எண்ணின் சூல் மழை அல்ல; இராவணன்
	கண்ணின் சிந்திய தீக் கடு வேகத்த
	விண்ணில் செல்வன, மீண்டு இன்று வீழ்வன.

இனும் மாசு அற எண்ணின்- மேலும் குற்றமின்றிச் சிந்தித்துப் பார்ப்போமாயின்; மண்ணில் செல்வன செல்- மண்ணின் மீது வீழும் இடியேறுகள்; சூல் மழை அல்ல- கருக்கொண்ட முகில்களில் பிறப்பன அல்ல; இராவணன் - அரக்கனாகிய இராவணன்; கண்ணில் சிந்திய தீ- (இராமனுடன் போரியற்றுங்கால்) கண்களில் கக்கிய நெருப்பு; கடுவேகத்த - விரைந்த வேகத்தோடு; விண்ணில் செல்வன- வானில் செல்லுவதே ஆகும்; மீண்டும் இன்று வீழ்வன - அந்நெருப்பே இன்றும் வானிலிருந்து (இடியாக) வீழ்கிறது.
இப்பாடலில் தற்குறிப்பேற்ற அணி அமைந்துள்ளது.
(41)