:: TVU ::

இராவணன் வதைப் படலம்

311

9745.	மால் கலங்கல் இல் சிந்தையன் மாதிரம்
	நால் கலங்க நகும்தொறும், நாவொடு
	கால் கலங்குவர், தேவர்; கண மழைச்
	சூல் கலங்கும்; இலங்கை துளங்குமால்.

மால் கலங்கலில் சிந்தையன்- திருமாலைக் கண்டு கலக்கமற்ற மனம் படைத்தவனான இராவணன்; நால் மாதிரம் கலங்க- நான்கு திசைகளும் நிலைகுலையும்படி; நகும் தொறும் - பெருஞ்சிரிப்புச் செய்யும் போது; தேவர்- தேவர்கள்; நாவொடு கால் கலங்குவர்- நாக்கும், பாதமும் நடுங்குவர்; சூல்- கருக்கொண்ட; கணமழை கலங்கும்- முகில் கூட்டங்கள் கலங்கும்; இலங்கை- இலங்கை மா நகரமும்; துளங்கும் - நடுக்கம் கொள்ளும்.
(42)
9746.	இக் கணத்தும் எறிப்ப தடித்து என,
	நெக்க மேகத்து உதிக்கும் நெருப்பு என,
	பக்கம் வீசும் படைச் சுடர், பல் திசை
	புக்குப் போக, பொடிப்பன போக்கு இல.

பக்கம்- (இராவணனது இரு) பக்கங்களிலும்; வீசும் படைச்சுடர் - ஒளி வீசுவனவாகிய ஆயுதங்களின் ஒளி; பல் திசை புக்குப் போக- பல்வேறு திசைகளிலும் புகுந்து செல்பவை; பொடிப்பன- (அனைத்தையும்) சாம்பலாக்கின; போக்கு இல- தாம் அழியாதிருந்தன; (அவைதாம்) இக்கணத்தும்- இந்த நேரத்திலே கூட; நெக்க மேகத்து- சிதைந்த மேகத்தினிடத்து; உதிக்கும் - தோன்றும்; நெருப்பு என - மின்னலாகவும்; தடித்து என - இடியாகவும்; எறிப்ப- ஒளி வீசுகின்றன.
(43)
இராவணன் சின மொழி
9747.	'கொற்ற அம்பிற் கொடு கொல்லுதல் கோள் இலாச்
	சிற்றையாளனைத் தேவர்தம் தேரொடும்
	பற்றி வானில் சுழற்றி, படியின்மேல்
	எற்றுவேன்' என்று உரைக்கும், இரைக்குமால்.

'கொற்ற அம்பிற் கொடு- வெற்றி தரும் அம்பு கொண்டு; கொல்லுதல் - கொல்லுதலாகிய; கோள் இலா- நோக்கு இன்றி;