கொம்பின்- அதோ அங்கிருப்பவர் கூந்தலைக் கொண்ட யமன்
என்று கூறத்தக்க ஓர் பெண்ணின், கொடுமைக்கு ஊற்றம் ஆகி,
பண்டு உதித்தனர் என்பவர்- கொடுமைக்கு ஊன்றுகோலாக
முற்காலத்தில் தோன்றியவர் எனப்படுவார்.
 

ஆல் - ஈரிடத்தும்  அசை,  சிவபிரான்  சங்காரத்  தொழில்
முதலிரண்டடிகளில்  குறிக்கப்  பெறுகின்றது. அங்ஙனம் அழிவு
செய்யுங்  காலத்து  அவ்விழியினின்றும்  தோன்றியவர் என்பதாம். 
ஈசனின்  ஐந்து   முகங்களாவன,   1. ஈசானம்,  2. தற்புருடம், 
3. அகோரம், 4. வாமதேவம்,   5. சத்யோசாதம்  என்பனவாம். 
ஐம்பால் - கூந்தல். இவர்களை  ஆதியில்  பெற்ற தாய் கூற்றுப் 
போன்ற கொடுமையுடையளாய்  இருந்தாள் என்பதனை இங்ஙனம் 
குறித்தார். கொம்பு - உவமையாகு பெயராய்ப் பெண்ணைக் குறித்தது. 
 

சூலம்  ஏந்தி   முன் நின்றவர் -  சூலம்  ஏந்திக்கொண்டு
நம்முன் நின்ற இவர்;   காலன் மார்பிடைச் சிவன் கழல் பட
- எமனுடைய மார்பில் சிவனது திருவடி படுதலால்; பண்டு கான்ற
வேலை ஏழ் அன்ன குருதியில் தோன்றிய வீரர் - முன்பு 
அவனது உடம்பிலிருந்து வெளிப்பட்ட இரத்தத்தில் தோன்றிய வீரர்
ஆவார். இந்நின்ற தொகையார் ஆலகாலத்தின் அமிழ்தின்
முன்   பிறந்தபோர்   அரக்கர் -   இங்கு  நின்ற குழுவினர்
ஆலகாலத்தில் அமிழ்திற்கு முன்னாகப் பிறந்த போர்த்திறன் 
மிக்க அரக்கராவார்.
 

காலன் - உரிய காலத்தில் உயிர்களைக் கவர்ந்து செல்லும்
யமன். ''காலனும் காலம் பார்க்கும்'' (புறநா - 41) என்பது
காண்க. மார்கண்டேயனுக்காக சிவபெருமான் காலாலுதையுண்ட
யமன் கக்கிய இரத்தத்தினின்றும் தோன்றியவர். 'சூலம் ஏந்தி 
முன்னின்றவர்' என்றும், தொகையாக நின்றோர் பாற்கடல் 
கடைந்த காலத்து முன்பு தோன்றி வந்த ஆலகால விடத்தில் 
அமிழ்துக்கு முன்பு தோன்றியவர்' என்றும் கூறப்பட்டது. 
 

(26)