தூதர் கூறிட ஓத வேலையின் நாயகர் எவரும்- தூதுவர்
இராவணன் ஆணையைக் கூறவும் பெருக்கெடுத்த கடல்போற் பரந்த
சேனைத் தலைவர்  எல்லோரும்;   திசைதொறும் திசைதொறும்
தொடர்ந்தார்   வந்து   உற்றார்- திக்குகளிலெல்லாமிருந்து
அணி வகுத்து வந்தவராய்; இராவணன் பொலன்தாள் போது
தூவினர் -   இராவணனுடைய   அழகிய  பாதங்களில் மலர்
தூவினவராய்; மோதும் மோலியின் பேர் ஒலி வானினை முட்ட
வணங்கினர் - மகுடத்தோடு மகுடம் மோதுவதால் உளதாய பெரிய
ஒலிவானை முட்டுமாறு ஒருவர்க்கு ஒருவர் முற்பட்டு வணங்கினர்.
 

ஓதம் - நீர்ப்பெருக்கு, ''திரைய வீங்கோதம் தந்து''
(சிலம் கானல் வரி - சார்த்துவரி) 'போது' - மலரும்
பருவத்தரும்பு 'காலை அரும்பிப் பகலெல்லாம் போதாகி'
(குறள் - 1227) 
 

(32)
 

அனையர் யாவரும் அருகு சென்று அடிமுறை வணங்கி- 
(அவ்வாறு) அப்படைத்தலைவர் யாவரும் இராவணன் அருகிற் சென்று 
அவனடிகளை முறையாக வணங்கி; வினையம் மேவினர் இனிதின் 
அங்கு இருந்தது ஓர் வேலை- பணிவு பொருந்தினவராய் இனிதாக 
அங்கு இருந்தபோது; மறவோன், நும் வரவு நினையும் நல்வரவு 
ஆக! என நிரம்பி- பெருவீரனாகிய இராவணன் (அவர்களை நோக்கி)
நும் வரவு யான்  நினைக்கின்றபடி  நல்வரவு  ஆவதாக! என்று
வரவேற்புச் செய்து முடித்து; 'மனையும் மக்களும் வலியரே?'
என்றனன் - 'நும் மனைவியும் மக்களும் மெலிவின்றி வலியராக
இருக்கின்றனரோ' என நலம் உசாவினான்.