:: TVU ::

யுத்த காண்டம்

இவர்களையும்; கடப்பார்- போரில் வென்று மேம்படுவர் அவ் அரக்கர்கள்.
இவரையும் என்பதில் உம்மை, உயர்வு சிறப்பு.
(11)
9310.	ஒருவரே வல்லர், ஓர் உலகத்தினை வெல்ல;
	இருவர் வேண்டுவர், ஏழ் உலகத்தையும் இறுக்க;
	திரிவரேல், உடன் திரிதரும், நெடு நிலம்; செவ்வே
	வருவரேல் உடன் கடல்களும் தொடர்ந்து, பின்
	வருமால்.

ஓர் உலகத்தினை வெல்ல ஒருவரே வல்லர்- ஓர் உலகத்தை வெல்ல வேண்டுமாயின் அவ் அரக்கர்களில் ஒருவரே அதற்கு வேண்டிய வல்லமை உடையவர்; ஏழ் உலகத்தையும் இறுக்க இருவர் வேண்டுவர் - ஏழு உலகங்களையும் அழிப்பதற்கு அவர்களில் இருவர் தேவைப்படுவார்கள்; திரிவரேல் நெடுநிலம் உடன் திரிதரும்- அவர்கள் ஓர் இடத்தில் நில்லாமல் திரிந்து கொண்டிருப்பாராயின் பெரிய நிலவுலகம் அவர்களுடனே சேர்ந்து திரியும்; செவ்வே வருவரேல்- நேராக அவர்கள் வந்தால்; கடல்களும் உடன் தொடர்ந்து பின்வரும் - கடல்களெல்லாம் ஒன்றாகத் தொடர்ந்து அவர்கள் பின்னே வரும்.
ஆல் - அசை.
(12)
நால்வகைப் படைகள்
9311.	மேகம் எத்தனை, அத்தனை மால் கரி, விரிந்த
	நாகம் எத்தனை, அத்தனை தேர்; நனி நாளாப்
	போகம் எத்தனை, அத்தனை புரவியின் ஈட்டம்;
	ஆகம் உற்றன எத்தனை, அத்தனை அனிகம்.

மேகம் எத்தனை அத்தனை மால் கரி- மேகங்கள் எத்தனை உண்டோ அத்தனை பெரிய யானைகள்; விரிந்த நாகம் எத்தனை அத்தனை தேர் - எங்கணும் பரவியுள்ள யானைகள் எத்தனையோ அத்தனைக்கு ஈடான தேர்கள்; நனி நாளாப் போகம் எத்தனை அத்தனை புரவியின் ஈட்டம் - நெடுநாளாகி விளைந்த (நெல்மணிகள்) விளைச்சலில் எத்தனையோ அத்தனை குதிரைகளின் கூட்டம்; ஆகம் உற்றன எத்தனை அத்தனை அனிகம் - உடல்