(இ - ள்.) கோடி கோடி கொலை வேடர் - எண்ணற்ற கொலைத்
தொழில் புரிகின்ற வேடர்கள், பணிலம் ஒத்த பலகறை நிரைத்த பல
கவசம் இட்டு-சங்குகளுக்கு ஒப்பான சோகிகளை வரிசையாக நிரப்பிக்
கோத்து அணிசெய்யப்பெற்ற பல சட்டைகள் அணிந்து, வெகு துவசராய் -
பல கொடிகளையுடையவராய், அணி மயிர்க் கரடி - அழகிய மயிர்
நிறைந்த உடலையுடைய கரடிகள், மத கரித் திரள் - மதநீர் பாயும்
யானைக்கூட்டங்கள், புலி முதல் கிரியின் அளவவாய் - புலி முதலாகப்
பன்றி ஈறாகவுள்ள, கணில் எதிர்த்தவைகள் - கண்ணில் எதிர்ப்பட்ட
மிருகங்களையும், கரவில் உற்றவைகள் - மறைவிடங்களில்
இருக்கின்றவற்றையும், துணி படர் கருவி எறியும் அக்குணில் எடுத்து -
துண்டங்களாகும்படி கோபித்து எறிகின்ற அக்குறுந்தடிகளை எடுத்து,
உலகம் நிறைய வந்தனர்கள் - நாடெல்லாம் நிரம்பும்படி வந்தார்கள்.

     கணில்: கண்ணில் என்பதன் தொகுத்தல்,

     ஏகாரம் : ஈற்றசை, பணிலம் - சங்கு. கரடி புலி முதலியன
கண்ணில் கண்டாலும் மறைந்திருந்தாலும் அவற்றை யெறிந்து
கொல்லக்கூடிய குணில் கொண்டு வந்தனர் எனக் குணிலைச் சிறப்பித்தனர்.
இதனால் வேடர் சிறப்பு விளங்கிற்று.
                                                     (9)

 

530.	வென்றி மத்தக மதக்க ளிற்றுநெடு    வெண்மருப் பில்விளை முத்தமும் குன்றி முத்துநிரை ஒக்கவைத் தகன    கோவை மார்பினிடை தாழவே பன்றி யிற்பரு மருப்பி னைத்தொழில்    பயின்ற கண்டிகை அணிந்துயிர் கொன்று தின்பது விரும்பி வந்தனர்    குடார வேடரொரு கோடியே.

     (இ - ள்.) வென்றி மத்தக மதக் களிற்று நெடு வெண் மருப்பில் -
வெற்றியையுடைய மத்தகமும் மதமும் உடைய யானைகளின் நீண்ட வெண்
மருப்பில், விளை வெண் முத்தமும் - விளைகின்ற வெண்மையான
முத்துகளும், குன்றி முத்தும் - குன்றி மணியும், நிரை யொக்கவைத்த கன
கோவை - வரிசையாக ஒன்றுபோல வைத்துக் கோத்த கனமான மாலைகள்,
மார்பினிடை தாழ - மார்புகளில் தாழ்ந்து தொங்க, பன்றியின் பரு மருப்பு
இணைத்து எழில் பயின்ற கண்டிகை அணிந்து - பன்றியின் பருமையான
கொம்புகளைச் சேர்த்து அழகு ஓழுகத் தொடுத்த கண்டிகைகளை
அணிந்து, உயிர் கொன்று தின்பது விரும்பி - உயிர்களைக் கொன்று
தின்பதையே விரும்பி, குடார வேடர் ஒருகோடி - கோடரிகளைக் கையில்
கொண்ட வேடர் எண்ணற்றவர். வந்தனர் - வந்தார்கள்.