2. மனையறம்படுத்த காதை

10	குலத்திற்குன்றாக் கொழுங்குடிச் செல்வர் அத்தகு திருவின் அருந்தவ முடித்தோர் உத்தர குருவி னொப்பத் தோன்றிய கயமலர்க் கண்ணியும் காதற் கொழுநனும்

உரை

       குலத்திற் குன்றாக் கொழுங்குடிச் செல்வர் - குல வொழுக்கத்திற் குன்றாத நற்குடியினராகிய செல்வர்கட்கு, அத்தகு திருவின் அருந்தவம் முடித்தோர் உத்தர குருவின் ஒப் பத்தோன்றிய - அங்ஙனம் அறத்தின் ஈட்டிய பொருளாலே தலைப்படுதானத்தைச் செய்தோர் எய்தும் உத்தரகுருவை அந் நகர்ஒக்கும்படி தோன்றிய, கயமலர்க் கண்ணியும் காதல் கொழுநனும் - பெரிய மலர்போலும் கண்ணினையுடையாளும் அவளாற் காதலிக்கப்படும் கொழுநனும்,

       குலவொழுக்கமாவன : ¹"நெடுநுகத்துப் பகல்போல, நடுவு நின்ற நன்னெஞ்சினோர், வடுவஞ்சி வாய்மொழிந்து, தமவும் பிறவு மொப்ப நாடிக், கொள்வதூஉ மிகைகொளாது கொடுப்பதூஉங் குறைகொடாது" வாணிகஞ் செய்தல் முதலியன. செல்வர் என்றது இருவர் தந்தையையும். அருந்தவம் - ஈண்டுத் தலைப்படு தானத்தின் மேற்று. முடித்தோர் எய்தும் என ஒரு சொல் வருவிக்க. உத்தர குரு: - போக பூமி யாறனுள் ஒன்று. தலைப்படுதானம் இன்னதென்ப தனை,

       ²"அறத்தி னாற்றிய வரும்பெரும் பொருளைப்
       புறத்துறைக் குற்றமூன் றறுத்தநற் றவர்க்குக்
       கொள்கெனப் பணிந்து குறையிரந் தவர்வயின்
       உள்ளமுவந் தீவ துத்தம தானம்"

என்பதனானும், போக பூமியின் இயல்பினை,

       ³"பதினா றாட்டைக் குமரனுஞ் சிறந்த
       பன்னீ ராட்டைக் குமரியு மாகி
       ஒத்த மரபினு மொத்த வன்பினும்
       கற்பக நன்மரம் நற்பய னுதவ
       ஆகிய செய்தவத் தளவு மவ்வழிப்
       போகம் நுகர்வது போக பூமி"

என்பதனானும், போக பூமியின் வகையாறனையும்,

       ⁴"ஆதியரி வஞ்சம் நல்லரி வஞ்சம்
       ஏமத வஞ்சம் இரண வஞ்சம்

  தேவ குருவம் உத்தர குருவமெனப்
       போக பூமி யறுவகைப் படுமே"

என்பதனானும் அறிக. கய - பெருமை ;

       ⁵"தடவும் கயவும் நளியும் பெருமை"

       என்பது தொல்காப்பியம். கயமலர் - நீர்ப்பூ என்னலுமாம். இவர்கள் தோன்றிப் போகம் நுகர்தலால் புகார் உத்தர குருவை யொத்த தென்க. மாநகர்க்கண் அந்நகர் உத்தர குருவை யொக்கும்படி செல் வர்க்குத் தோன்றிய கண்ணியும் கொழுநனும் என்றுரைக்க.

^1. பட்டினப். 206-210. ^2.பிங்க. 3-வது, ^3. பிங்க, 6-வது. ^4. திவா, 12-வது, ^5. தொல், சொல், 320.