விராதன், சீதையைக் கவர்ந்து செல்லுதல்

    நிணம் உண்ட நெடுவெண் பல்லும் வல்எயிறும் - தசையைப்
புசித்த நீண்ட வெண்ணிறப் பற்களும் வலிய கோரப்பற்களும்; மின்னு
பகுவாய் முழைதிறந்து - விளங்கும் பிளந்த வாயாகிய குகையைத் திறந்து;
‘நில்லும் நில்லும்’ எனச்சொல்லும் எல்லையில் - ‘நில்லுங்கள்,
நில்லுங்கள்’ என்று சொன்ன அளவில்; அல்லிபுல்லும் அலர் அன்னம்
அனையாளை - அகவிதழ்கள் நெருங்கிய தாமரை மலரில் வீற்றிருக்கும்
அன்னப் பறவை போன்ற சீதையை; வந்து ஒருகை முகந்து உயர்விசும்பு
தொடர - எதிர் வந்துஒருகையால் எடுத்து உயர்ந்த வானத்தில் தொடர்ந்து
செல்ல;

     எயிறு - பல்லின் விளிம்பும் ஆம். நில்லும் நில்லும் - அடுக்கு.
அன்னம் -ஆகுபெயர்.                                         19