சடாயு, 'நீவிர் வனம் புகுந்தமை என்?' என வினவல்

     (பின் அச்சடாயு) வேந்தன் விண் அடைந்தான் எனின் -
தயரதச்சக்கரவர்த்தி துறக்கம் சென்றான் என்றால்; வீரர் நீர் ஏந்து ஞாலம்
இனிது அளியாது இவண் போந்தது என்னை - வீரர்களாகிய நீங்கள்
ஆள்வதற்குரிய நாட்டை மனம் விரும்பிக் காப்பாற்றாமல் இங்கு வந்தது
எக்காரணத்தால்?; புகுந்த என் - வந்து சேர்ந்த தீமைகள் எவை?;
புந்திபோய்க் காந்துகின்றது - என் அறிவு ஒரு நிலையில் நிற்காமல்
எரிகின்றது; கட்டுரையீர் என்றான் - எடுத்து முறையாகக் கூறுங்கள்
என்றார்.

     வீரர் நீர் என்றதால் பெரு வீரர்களாய்க் காணப்படும்
இராமலக்குவரைப் பகைவர் விரட்டியிருக்க இயலாது என எண்ணிய
எண்ணம் குறிப்பாக உணரப்பெறுகிறது. 'ஏந்து ஞாலம்' என்பது வழி வழி
உரிமையுடன் ஆண்டு வரும் நில உலகம். புந்தி - புத்தி, இங்கு மனம்
எனவும் கொள்ளலாம்.

     கட்டுரை என்பது மனத்திலுள்ள பொருளை வகைப்படுத்தி முறையாகத்
தொகுத்துரைத்தல்.                                            31