அறிவுரையைக் கரன் புறக்கணிக்க, படைகள் போர்மேல் செல்லுதல் | 2948. | உரைத்த வாசகம் கேட்டலும்,
உலகு எலாம் உலையச்
சிரித்து, 'நன்று நம் சேவகம்!
தேவரைத் தேய
அரைத்த அம்மி ஆம் அலங்கு எழில்
தோள், அமர் வேண்டி
இரைத்து வீங்குவ, மானிடற்கு
எளியவோ?' என்றான்.' |
உரைத்த வாசகம் கேட்டலும் - (இவ்வாறு) அகம்பன் கூறிய
வார்த்தைகளைக் கேட்டவுடன்; உலகு எலாம் உலையச் சிரித்து - (கரன்)
உலகங்கள் யாவும் நிலை தளர்ந்து நடுங்குமாறு சிரித்து; தேவரைத் தேய
அரைத்த - தேவர்களைத் தேய்த்து உருத்தெரியாமல் அரைத்த; அம்மி
ஆம் - அம்மிக்கல் என்னும்; அலங்கு எழில் தோள் - அசைந்து
விளங்குகிற என் தோள்கள்; அமர் வேண்டி - போரினை விரும்பி;
இரைத்து வீங்குவ - பூரித்துப் பெருத்துள்ளன; மானிடற்கு எளியவோ -
(அத்தகைய தோள்கள்) ஒரு மனிதனுக்கு எளிமைப் படுவனவோ?; நம்
சேவகம் நன்று' - நமது வீரம் நன்றாயிருந்தது; என்றான் - என்று
கூறினான். தான் முன்னர்ப் புயவலிமையால் தேவர் பலரை அழித்தமை குறித்துத்
'தேவரைத் தேய அரைத்த அம்மியாம் தோள்' என்றது. தேவர்களை
எளிதில் அழித்த நாமோ இம் மனிதனுக்கு அஞ்சுவது? என்று அகம்பன்
கூறியதை ஏளனஞ் செய்து கூறியவாறு. நன்றிது : இது - அசைநிலை. இரைத்து வீங்கும் - ஒரு பொருட்
பன்மொழி தோளாகிய அம்மிக்கு வலிமையைக் குழவியாகவும், தேவர்களை
அரைக்கப்படு பொருளாகவும் கொள்ளுதல் வேண்டும்: ஏகதேசஉருவகம். 74 |