கேடகத் தடக் கைய - கேடகம் என்னும் படைக் கருவியையேந்திய
பெரிய கையையுடையனவும்; கிரியின் தோற்றத்த - மலை போன்ற
வடிவையுடையனவும்; ஆடகக் கவசத்த - பொன்னாலாகிய
கவசங்களையுடையனவுமாகிய; கவந்தம் ஆடுவ - தலையற்ற உடற்
குறைகள் துடித்துத் துள்ளுவன; பாடகத்து அரம்பையர் மருள -
பாடகமாகிய காலணியையணிந்த தேவமாதர்கள் மயங்கும்படி; பல்வித
நாடகத் தொழிலினை - பல வகைப்பட்ட நடனத் தொழில்களை; நடிப்ப
ஒத்த - நடித்துக் காட்டுவன போன்றன.

     தலை அறுபட்ட வீரர்களின் உடற்குறைகள், ஆடல் வல்ல
தேவமாதர்களும் கண்டு வியக்கும்படி, பலவாறு விசித்திரமாகக் கூத்தாடின
என்பது.

     அரம்பையர் என்பது இங்கே பொதுவாகத் தேவ மகளிரைக் குறிக்கும்.
பாடகம் - ஒரு வகைக் காலணி.                                119