மனத்து - என் மனத்தில்; ஆசை ஆக்கினேன் - (இராமன்பால்)
ஆசையை வளர்த்தேன்; அவ் ஆசை - அந்த (வேண்டாத) ஆசை; என்
மூக்கினோடு முடிய - என் மூக்கு முதலியன அறுபட்டதோடு
முடிந்தொழிய; முடிந்திலேன் - (அவ்வளவில்) இறந்து படாத நான்;
வாக்கினால் - என் வாய்ச் சொற்களால்; உங்கள் வாழ்வையும் நாளையும்
போக்கினேன் - உங்களுடைய வாழ்க்கையையும் வாழ்நாளையும்
ஒழித்தேன்; கொடியேன் -

(ஆதலால்) மிகவும் கொடியவளாவேன்; என்று போயினாள் - என்று
புலம்பிக் கொண்டு அந்த இடத்தைவிட்டுச் சென்றாள்.

     நான் இராமன்பால் ஆசை வைத்தேன்; அத் தகாத ஆசை
என்னுடைய மூக்கு ஆகியவற்றைப் போக்கிற்று; அதனால் நாணமுற்று
எனது உயிரைப் போக்கியிருக்க வேண்டும்; ஆனால், அவ்வாறு
இறந்திடாமல் 'எம்மவரே' இராமலக்குவரின் உயிரைப் போக்குங்கள் என்று
உங்களை ஏவி, உங்கள் செல்வ வாழ்வையும், உயிர் வாழ்க்கையையும்
ஒழிக்கக் காரணமானேன்; ஆகையால் நான் கொடியவள்' என்று தன்னை
நொந்தவாறு சூர்ப்பணகை சென்றாள் என்பது.                      191