நிலை இலா - நிலையற்றதான; உலகினிடை - உலகத்தில்;
நிற்பனவும் - (இடம் பெயராது) நிலை நிற்கும் இயல்புடைய தாவரப்
பொருள்களையும்; நடப்பனவும் - (இடம் பெயரும் இயல்பினவான)
சங்கமப் பொருள்களையும்; நெறியின் ஈந்த - முறையாகப் படைத்த;
மலரின் மேல் நான்முகற்கும் - (திருமாலின்) உந்திக் கமலத்தின்
மேலமர்ந்த பிரமனுக்கும்; வகுப்பு அரிது - படைத்தற்கு அரியதாகவும்;
நுனிப்பது ஒரு வரம்பு இல் ஆற்றல் - நுட்பமாக அறிகிற ஒப்பற்றதும்
அளவற்றதுமாகிய வல்லமையால்; உலைவு இலா வகை இழைத்த -
(தமக்கும் பிறர்க்கும்) தீமை தராத வகையில் செய்யப் பெற்ற; தருமம் என
- அறத்தினைப் போன்று; நினைந்த எலாம் உதவும் - நினைத்த
அனைத்தையும் நினைத்தபடியே உண்டாக்கித் தரவல்ல; தச்சன் - தெய்வத்
தச்சனாகிய விசுவகர்மாவின்; புலன் எலாம் - சிற்ப நூலறிவு முழுவதையும்;
தெரிப்பது - எடுத்துக் காட்டுவதாகிய; ஒரு - ஒப்பற்ற; புனை மணி
மண்டபம் அதனில் - மணிகள் குயிற்றிச் செய்யப் பெற்ற சபை
மண்டபத்திலே; பொலிய - (தன் வீற்றிருக்கையால்) அம் மண்டபம் அழகு
பெறுமாறும்...(மன் ஓ - அசைகள்).

     இப்பாடல் முதல் இருபத்திரண்டு பாடல்களில் வினையெச்சங்களாகத் -
(பொலிய, வயங்க, குலவ என்றாற் போல) தொடர்ந்து இருபத்து மூன்றாம்
பாடலில் இருந்தனன் என்னும் வினைமுற்றால் பொருள் முடிவு
எய்துகின்றது.

     இராவணனின் மணி மண்டபம் தெய்வத் தச்சனின் அறிவுத்
திறமெலாம் புலப்படுத்துவது; அதன் மேலும் அதன் சிறப்பை வரம்பு இலா
ஆற்றல் கொண்டதும் எவர்க்கும் தீமை தராத வகையில் செய்யப்
பெற்றதுமான அறத்தை உவமையாக்கிப் புலப்படுத்திய பாங்கு
நினையத்தக்கது.

     நான்முகனாலும் படைத்தற்கு அரியது; தெய்வத் தச்சன் புலன் எலாம்
தெரிப்பது மண்டபத்தின் சிறப்பு. அம் மண்டபத்தில் வீற்றிருப்பதால்
இராவணனுக்குப் பொலிவு என்பதனை உணர்த்தப் 'பொலிய' எனச்
சுட்டினார்.                                                  2