| 3145. | 'மீன் கொண்டு ஊடாடும் வேலை
மேகலை உலகம் ஏத்த,
தேன் கொண்டு ஊடாடும் கூந்தல்,
சிற்றிடை, சீதை என்னும்
மான் கொண்டு ஊடாடு நீ; உன்
வாள் வலி உலகம் காண,
யான் கொண்டு ஊடாடும்வண்ணம்,
இராமனைத் தருதி என்பால். |
மீன்கொண்டு ஊடாடும் வேலை - மீன்களைத் தன்னகத்தே
கொண்டு அசையும் கடலினை; மேகலை - மேகலை அணியாகப்
பெற்றிருக்கும்; உலகம் - உலக மக்கள்; ஏத்த - புகழும் வண்ணம்; தேன்
கொண்டு ஊடாடும் கூந்தல் - வண்டுகள் மணம் நாடித் தேடி வந்து
ஆடும் கூந்தலையும்; சிற்றிடை - சிறிய இடையையும் உடைய; சீதை
என்னும் மான் - சீதையென்னும் மான் போன்றவளை; நீ கொண்டு
ஊடாடு - நீ மனைவியாகக் கொண்டு அவளோடு மகிழ்ந்திருப்பாயாக; உன்
வாள் வலி உலகம் காண - உன்னுடைய வாளாற்றலை உலகம் கண்டு
வியக்கும்படியாக; யான் கொண்டு ஊடாடும் வண்ணம் - நான்
துணைவனாகக் கொண்டு மகிழ்ந்திருக்குமாறு; இராமனை என்பால் தருதி -
இராமனை எனக்குக் கொடுப்பாயாக. உன் வலிமையால் இராமனையும் சீதையையும் கைப்பற்றி அவனை
எனக்குத் தந்து, அவளை நீ எடுத்துக்கொள் எனத் தன் காம நோக்கை
வெட்கமின்றிக் கூறினாள். 79 |