அருகு உறு பாலின் வேலை - பக்கத்தில் அமைந்துள்ள பாற்
கடலினின்றும்; அமுதெலாம் அளைந்து வாரி - அமுதம் முழுவதையும்
வாரி யெடுத்து; பருகின பரந்து பாய்ந்த நிலாச் சுடர் - குடித்து எங்கும்
விரிந்து பரவிய சந்திரனின் ஒளியான; பனி மென் கற்றை - மெல்லிய
குளிர்ந்த கிரணங்கள்; நெரியுறு புருவச் செங்கண் அரக்கற்கு - இப்போது
நெரிந்த புருவங்களையும் சிவந்த கண்களையும் உடைய இராக்கதனாகிய
இராவணனுக்கு; நெருப்பின் நாப்பண் - நெருப்பின் நடுவே
(வைக்கப்பட்டதால்); உருகிய வெள்ளி - கொதித்த வெள்ளிக் குழம்பை;
அள்ளி வீசினால் ஒத்தது - கைகளால் வாரி வீசினாற் போன்றிருந்தது.
(அன்றே - அசை).

     பாற்கடலில் தோன்றிய சந்திரன் அக்கடலிலிருந்தும் தோன்றிய
அமுதத்தைப் பருகி நிலவொளியாக வெளியிடுவதாகக் கூறுதல்
தற்குறிப்பேற்ற அணி.                                         109