ஆசையை விளம்பி, அரக்கன் சீதைஅடிவணங்கல்

    என்று அவள் உரைக்க - என்று சீதை சொல்ல; நின்ற
இரக்கம் இல் அரக்கன் - அவன் முன் நின்ற இரக்கமற்ற
அரக்கனாம் இராவணன்; உன்துணைக் கணவன் எய்த அம்பு -
உன்னுடைய வாழ்க்கைத் துணைவனான கணவன் ஏவிய அம்பு; அவ்
உயர் திசை சுமந்த ஓங்கல் வன்திறல் மருப்பின் ஆற்றல் -
அந்தச் சிறந்த திக்குகளைத் தாங்கிய மலை போன்ற யானைகளின்
வலிய திறமை வாய்ந்த தந்தங்களின்; ஆற்றல் மடித்த என் மார்பில்
வந்தால் - வலிமையை அழித்த என் மார்பகத்தில் தைக்க வந்தால்;
குன்றிடைத் தொடுத்து விட்ட பூங்கணை கொல் அது என்றான் -
மலையிடத்து தொடுத்து ஏவிவிட்ட மலரம்பு போல் ஆகும் எனக்
கூறினான்.

     பெண்ணென்றும் பார்க்கவில்லை. உலக ஒழுக்கமும்
பார்க்கவில்லை. ஆதலால் அரக்கன் மனத்தில் இரக்கமில்லை.
'உன்துணைக் கணவன்' என்ற தொடரில் உன்போல் பெண் தன்மை
உடைய கணவன் என்ற இகழ்ச்சியும் தொனிக்கிறது. ஓங்கல் - மலை.
இங்கு மலை போன்ற யானையைக் குறிப்பதால் உவமை ஆகுபெயர்.
இராவணன் மார்புக்குக் குன்றும், இராமன் அம்பிற்குப் பூங்கணையும்
உவமையாம். குன்றின் மேல் எறிந்த மலர் அதற்கு எத்தீங்கும்
விளைவிக்காதது போன்று இராமன் அம்பு தன்னை ஒன்றும் செய்யாது
எனச் சுட்டினான். கொல்-அசைநிலை.                         69