இராவணன் ஏளனமும் சீதையின் இடித்துரையும்

அறுசீர் ஆசிரிய விருத்தம்

    என்று இன்ன பலவும் பன்னி - இவ்விதம் பல சொற்களைச்
சொல்லி; இரியலுற்று அரற்று வாளை - நிலைகெட்டு வாய் விட்டுப்
புலம்பி அழும் சீதையை, (நோக்கி); வாழ்க்கை நாள் வறிது
வீழ்ப்பான் - தனது வாழ்நாளை வீணாக அழித்துக் கொள்பவனான
இராவணன்; பொன் துன்னும் புணர்மென் கொங்கைப்
பொலன்குழாய் - பொற்கலன்கள் அணிந்த நெருங்கிய மார்புகளை
உடைய அழகிய குண்டலமணிந்த பெண்ணே!; அம்மானிடர் போரில்
என்னைக் கொன்று உன்னை மீட்பர் கொல் - அந்த மனிதர்கள்
சண்டையில் என்னைக் கொன்று உன்னை மீட்டு விடுவார்களோ?;
கொள்க - முடிந்தால் மீட்டுக் கொள்ளட்டும்; என்னா வன்திண்கை
எறிந்து நக்கான் - என்று கூறி வலிய திண்ணிய கைகளைப்
புடைத்துச் சிரித்தான்.

     பன்னுதல் - பல முறை கூறல். வாழ்க்கை நாள் வறிது
வீழ்ப்பான் - செயற்கரிய தவம் செய்து மூன்றரைக் கோடி
ஆண்டுகளை வாழ்நாளாகப் பெற்றும் தீய செயல் புரிந்து அவற்றை
வீணாகப் போக்குபவன். அத்தகைய தீயோர் அழிவது உறுதி என்பது
பெறப்பட்டது. பொன் துன்னும் - பொன்னிறம் பொருந்திய என்றுமாம்.
கைஎறிதல் - இகழ்ச்சியிலும் வெகுளியிலும் தோன்றும் மெய்ப்பாடு.
'அங்கதன் அதனைக் கேளா, அங்கையோடு அங்கை தாக்கித்துங்க
வன் தோளும் மார்பும் இலங்கையும் துளங்க நக்கான்' என வருவதை
(7001) இத்துடன் ஒப்பிடலாம்.

     கொல் - ஐயப்பொருளில் வந்த அசை.                      80