சடாயுவைக் கண்டு இராமன் புலம்பிச் சோர்தல்

    மடல் உள் நாட்டிய தார் இளையோன் - பூவிதழ்கள் உள்ளே
அமையத் தொடுக்கப்பட்ட மார்பு மாலையை அணிந்த இளையவனாகிய
இலக்குவன் (கூறிய); சொலைமதியா - சொற்களை மதித்து (ஏற்று);
மிடலுண் நாட்டங்கள் தீ உக நோக்கினன் - (காணும்) வலிமை அமைந்த
கண்களில் சினத்தீ வெளிப்படப் பார்த்தவனாகி; விரைவான் - விரைந்து
செல்லுகின்றவனாகிய இராமன்; உடலுள் நாட்டிய குருதி அம் பரவையின்
உம்பர் - உடலில் இருந்து வெளிப்பட்ட இரத்தமாகிய கடலுக்கு மேல்;
கடலுள் நாட்டிய மலையன்ன - கடலுள் (மத்தாக) நாட்டிய
மந்தரமலையை ஒத்த; தாதையைக் கண்டான் - தந்தையாகிய  சடாயுவைக்
கண்டான்.

     இலக்குவன் சொல்லை ஏற்றுச் சென்ற இராமன், கடலில் மத்தாக
அமைக்கப்பட்ட மந்தரமலை போல் தன் உடம்பில் இருந்து வெளிப்பட்ட
குருதிக் கடலிடைக் கிடந்த சடாயுவைக் கண்டான். மடல் - பூவிதழ்கள், தார்
- மார்புமாலை. மிடல் - வலிமை, ஈண்டுப் பார்வைச் சிறப்புக்கு அடையாக
வந்தது. நாட்டம் - கண், பரவை - கடல் உம்பர் - மேல், கடல் -
திருப்பாற்கடல் தார் இளையோன் - இரண்டாம் வேற்றுமைத் தொகை,
சொலை - இடைக்குறை. நோக்கினான் - முற்றெச்சம்.               92