மண்ணகம் திரிய - நிலவுலகம் (தன் நிலை கெட்டுச்) சுழல; நின்ற
மால் வரை திரிய - அசையாது நிற்கும் பெரிய மலைகள் சுழல; மற்றை -
மற்றும்; கண் அகன் புனலும் - இடமகன்ற (கடல்) நீரும்; காலும் -
காற்றும்; கதிரொடும் திரிய - கதிரவன் நிலவு உடன் சுழல; காவல்
விண்ணகம் திரிய - தேவர்கள் காக்கும் மேல் உலகம் சுழல; மேலை
விரிஞ்சனும் திரிய - மேல் உலகில் உள்ள பிரமனும் சுழல; வீரன் -
வீரனாகிய இராமன்; எண் அரும் பொருள்கள் எல்லாம் என்பது - தான்
எண்ண முடியாத உலகப் பொருள்கள் எல்லாவற்றின் வடிவமாக உள்ளவன்
என்பது; தெரிந்தது அன்றே - நன்கு விளங்கியது.

     அனைத்தும் அவனான படியினாலே அவன் மனநிலை மாறிச்
சினந்தவுடன் அனைத்துப் பொருள்களும் நிலை திரிந்தன என்றபடி. கால் -
காற்று, விரிஞ்சன் - பிரமன், மால்வரை - உரிச்சொல் தொடர், ஐ -
சாரியை, அன்றே - ஏகாரம் தேற்றம்.                            115