அன்னவள் - அத்தன்மையளாகிய அயோமுகி; இப்படி
ஏகினள் - (மேற்குறிப்பிட்ட) இவ்வாறு (இலக்குவனைத் தழுவித் தூக்கி
கொண்டு) சென்றாள்; இப்பால் - (இராமன் இருந்த) இவ்விடத்தில்;
வெப்புடை மெய்யொடு வீரன் - (மனைவியையும் தம்பியையும்
பிரிந்த) தாபம் கொண்ட உடலோடு கூடிய வீரனாகிய இராமன்; இடை
அப்பு தேடி நடந்த - காட்டின் இடையில் தண்ணீரைத் தேடிக்
கொண்டு நடந்து சென்ற; என் ஆவி - எனது உயிர் போன்ற;
துப்புடை மால்வரை - வலிமை உடைய பெரிய மலை
போன்றவனாகிய இலக்குவன்; தோன்றலன் என்னா - இன்னும்
வரக்காணோமே என்று எண்ணி; விரைந்தான் - (அவனைத்
தேடுவதற்காக) விரைந்து சென்றான்.

     அப்பு - நீர். துப்பு - வலிமை. வெப்பு - விரக வேதனையும் நீர்
வேட்கை வேதனையும் பாச வேதனையும் உண்டாக்கிய வெப்பம்.
அன்னவள் - குறிப்பு வினையாலணையும் பெயர். மால்வரை -
உரிச்சொல் தொடர். வரை - உவமையாகு பெயர்.                   62