பூ ஒடுங்கின - (இரவு வருதலும்) மலர்கள் குவிந்தன; பொழில்கள் -
சோலைகளில்; விரவுபுள் ஒடுங்கின - வந்து கலந்த பறவைகள் தத்தம்
இடங்களில் போய் அடங்கின; மா ஒடுங்கின - விலங்குகள் தம் செயல்
அடங்கின; மரனும் இலை ஒடுங்கின - மரங்களும் இலைகள் குவியப்
பெற்றன; கிளிகள் நா ஒடுங்கின-கிளிகள் பேசுதல் இன்றி அடங்கின;
மயில்கள் நா ஒடுங்கின - மயில்கள் ஆடுதல் ஒழிந்தன; குயில்கள் கூ
ஓடுங்கின- குயில்கள் இனிமையாகக் கூவுதலை நிறுத்தின; களிறு பிளிறு
குரல் ஒடுங்கின- யானைகள் பிளிறுதலாகிய பேரொலி அடங்கின.

     ஒடுங்குதல் - உறக்கம் கொண்டு ஒடுங்குதல்; ஒடுங்குதல் என்ற சொல்
ஒரே பொருளில் பலமுறை வந்ததால் சொற்பொருள் பின்வரு நிலையணியாகும்.
மரனும் என்றஇழிவு சிறப்பும்மை அதன் ஓரறிவுடைமையைக் குறித்தது.  கூ -
முதனிலைத் தொழிற்பெயர்; பிளிறு குரல் - வினைத்தொகை; இப்பாடல்
சுந்தரகாண்டம் 158 ஆம்பாடலை ஒத்திருத்தல் காண்க.(4992)          39