மயில் இயல் குயில் மொழி - மயில் போன்ற சாயலையும் குயிலின்
குரலை ஒத்த இனிய சொல்லையும் உடைய தாரையே! பெயர்வுற
வலிக்கவும்- (மந்தர மலையாகிய மத்து) நிலைபெயர்ந்து சுழலுமாறு வலிந்து
இழுக்கவும்; மிடுக்குஇல் பெற்றியார் - வலிமை இல்லாத தன் மையரான
தேவ அசுரர்கள்; அயர்வுறல் உற்றதை நோக்கி - தளர்ச்சி
அடைந்ததைப் பார்த்து; யான் - நான்; அது தயிர் எனக் கடைந்து -
அதனைத் தயிர் கடைவது போல் கடைந்து; அவர்க்கு அமுதம் தந்தது -
அவர்களுக்கு அமுதத்தைக் கொடுத்த செயல்; மறக்கல் ஆவதோ -
மறக்கக்கூடியது ஆகுமோ? (ஆகாது).

     மயில் இயல், குயில்மொழி - உவமைத் தொகைப் புறத்துப் பிறந்த
அன்மொழித்தொகை.  அண்மைவிளி, மறக்கல் ஆவதோ? - வாலி கடல்
கடைந்து அமுதளித்த பெருஞ்செயலைத் தாரை அறிந்ததே; எனவே, 'நீ
மறக்கக்கூடியதா' எனத் தாரைக்கு உரைத்தனன்.  இச்செயலை உலகத்தார்
மறக்கக்கூடியதா? என்று உலகினர் மறக்கமுடியாத அருஞ்செயலைச்
செய்வதன் வாலி என்பதை நிறுவினன் எனவும் கொள்ளலாம் - ஆவதோ -
ஓகாரம் எதிர்மறை.                                    27