| 4942. | கோது அறுகுவளை நாட்டம்
கொழுநர்கண் வண்ணம் கொள்ள,
தூதுளங் கனியைவென்று
துவர்த்தவாய் வெண்மை தோன்ற,
மாதரும் மைந்தர்தாமும்
ஒருவர்பால்ஒருவர் வைத்த
காதல்அம்கள்உண் டார்போல்,
முறைமுறைகளிக்கின் றாரை- |
கோது அறு -குற்றம்இல்லாத; குவளை நாட்டம் - (அரக்கியரின்)
குவளைப் பூப் போன்ற கரிய கண்கள்; கொழுநர் - தம் கணவரின்;
கண்வண்ணம் கொள்ள - கண்ணின் (சிவந்த) இயல்பைப் பெறவும்;
தூதுளங்கனியை - தூதுளம் பழத்தை; வென்று - (நிறத்தால்) வெற்றி
கொண்டு; துவர்த்த வாய் - செந்நிறம் பெற்றவாயில் வெண்மை தோன்ற -
வெண்மை நிறம் வெளிப்படவும்; (பூரண இன்பம் பெற்று) மாதரும் - அரக்கப்
பெண்களும்; மைந்தர்தாமும் - ஆடவர்களும்; ஒருவர் மேல் ஒருவர்
வைத்த - ஒருவர் பால் ஒருவர் கொண்டுள்ள; காதல்அம் கள் - காதலாகிய
மதுவை; உண்டார்போல் - உண்டவர்போல்; முறைமுறை - மாறி மாறி;
களிக்கின்றாரை - செருக்குக் கொள்பவராகிய காதலர்களையும். கரியகண்கள்சிவத்தலும், சிவந்த வாய் விளர்த்தலும் புணர்ச்சியால்
உண்டாகும். களி - உள்ளச் செருக்கு - (திருக்கோவை 52. பேராசிரியர்)
இச்செருக்கு - உவகை மிகுதி தந்தது. இது சம்போகம் (புணர்ச்சி) (108) |